ریونیو شارٹ فال پورا کرنے کیلئے مختلف شعبوں پر اضافی ٹیکس لگنے کا امکان

پاکستان میں ریونیو شارٹ فال کو پورا کرنے کے لیے حکومت نے مختلف شعبوں پر اضافی ٹیکس لگانے کا منصوبہ بنایا ہے۔

حکومت نے مالی سال کی دوسری ششماہی میں اس حوالے سے مجوزہ ہنگامی پلان کے بارے میں آئی ایم ایف کو آگاہ کر دیا ہے۔ اس پلان میں نان فائلرز، سولر پینلز اور ٹیلی فون صارفین پر ٹیکس بڑھانے کی تجویز دی گئی ہے۔

آئی ایم ایف کے ساتھ 7 ارب ڈالر کے قرض پروگرام کی اگلی قسط کے حصول کے لیے کچھ اہم شرائط سامنے آئی ہیں۔ ایف بی آر کے حکام کے مطابق اگر ٹیکس وصولیوں کا ہدف پورا نہ ہو سکا تو مزید 200 ارب روپے جمع کرنے کے لیے اقدامات کیے جائیں گے۔ ان اقدامات میں نان فائلرز کے لیے بینک سے نقد رقم نکالنے پر ٹیکس کی شرح میں اضافے، سولر پینلز پر سیلز ٹیکس بڑھانے اور ٹیلی فون صارفین پر اضافی ٹیکس لگانے کی تجویز شامل ہے۔

نان فائلرز کے لیے بینک سے نقد رقم نکالنے پر موجودہ ٹیکس کی شرح 0.8 فیصد سے بڑھا کر 1.5 فیصد کرنے کی تجویز ہے۔ اس اضافی ٹیکس سے 30 ارب روپے تک کی آمدنی متوقع ہے۔ سولر پینلز پر سیلز ٹیکس 10 فیصد سے بڑھا کر 18 فیصد کرنے کی تجویز دی گئی ہے، جس سے مزید ریونیو حاصل ہو گا۔

اسی طرح لینڈ لائن فون کے صارفین پر ٹیکس 10 فیصد سے بڑھا کر 12.5 فیصد کرنے کی تجویز ہے، جس سے 20 ارب روپے کا اضافی ریونیو متوقع ہے۔ موبائل کالز پر بھی ٹیکس میں اضافہ کیا جائے گا، جو کہ 15 فیصد سے بڑھا کر 17.5 فیصد کرنے کی تجویز ہے، جس سے 24 ارب روپے کی اضافی آمدن کی توقع ہے۔

ذرائع کے مطابق بسکٹ، مٹھائیاں اور چپس پر بھی 16 فیصد ایف سی ڈی (فیڈرل سیلز ٹیکس) کا نفاذ کیا جائے گا، جس سے 70 ارب روپے اضافی حاصل ہو سکتے ہیں۔

واضح رہے کہ ایف بی آر کو اس مالی سال کی پہلی سہ ماہی میں 198 ارب روپے کا شارٹ فال کا سامنا کرنا پڑا۔ اس سال کا مجموعی ٹیکس ہدف 14 ہزار 131 ارب روپے مقرر کیا گیا ہے۔ حکومت نے متبادل طور پر سالانہ ٹیکس ہدف یا اخراجات میں کمی کرنے کی تجویز بھی دی ہے۔