اے ٹی ایم فراڈ سے ہوجائیں خبردار!!! سائبر کرمنلز شہریوں کو کیسے پھنساتے ہیں؟ مکمل تفصیلات سامنے آگئیں

بینکوں اور ماہرین نے شہریوں کو "اے ٹی ایم کیش ٹریپنگ” کے فراڈ سے خبردار کردیا ہے۔

 یہ ایک نئی قسم کا فراڈ ہے جس میں جعلسازوں کے گروہ اے ٹی ایم مشینوں کو ہیک کر کے شہریوں کی رقم ہڑپ کرتے ہیں۔ اس طریقے میں اسکیمرز اے ٹی ایم کی کیش سلاٹ کو روکتے ہیں تاکہ ایسا لگے کہ مشین نے کام کرنا بند کر دیا ہے۔ اس دوران صارف کی رقم مشین سے باہر نہیں آتی۔

جعلساز گروہ اس صورتحال کا فائدہ اٹھاتے ہوئے، رقم نکلنے والے حصے کو بلاک کر دیتے ہیں۔ جب صارف اے ٹی ایم کا استعمال کر کے چلا جاتا ہے، تو اسکیمرز ان کی رقم نکال لیتے ہیں۔ اس واردات میں استعمال ہونے والے آلات کو "گلو ٹریپ” کہا جاتا ہے۔ یہ آلات خاص طور پر اے ٹی ایم کیش سلاٹ میں نصب کیے جاتے ہیں تاکہ اصل کیش ڈسپنسر کی جگہ پر جعلی ڈیوائس رکھی جا سکے۔

اس طریقے میں دو قسم کی کیش ٹریپس استعمال کی جاتی ہیں: ٹائپ ون اور ٹائپ ٹو۔ ٹائپ ون کیش ٹریپس واضح طور پر نظر آتی ہیں، لیکن صارف ان میں فرق نہیں کر پاتا۔ ٹائپ ٹو کیش ٹریپس چھپ کر رکھی جاتی ہیں، اور صارف کو ان کا کوئی اندازہ نہیں ہوتا۔ جعلساز اکثر اس بات کو یقینی بناتے ہیں کہ یہ ڈیوائسیں ایسی جگہوں پر نصب ہوں کہ صارف ان کی موجودگی کا احساس نہ کرے۔

ماہرین نے شہریوں کو اس فراڈ سے بچنے کے لیے کچھ احتیاطی تدابیر بتائی ہیں۔ سب سے پہلے، اے ٹی ایم کا استعمال کرنے سے پہلے اس کی ظاہری حالت چیک کریں۔ اگر مشین پر کوئی غیر معمولی شے یا شٹر نظر آئے تو فوراً اس کا استعمال نہ کریں۔ اگر کیش سلاٹ میں کچھ غلط لگے تو فوراً مشین سے پیچھے ہٹ جائیں۔

اس کے علاوہ، اے ٹی ایم پر پن نمبر درج کرتے وقت کی پیڈ کو ڈھانپنا چاہیے تاکہ کوئی دوسرا شخص آپ کا پن نمبر نہ دیکھ سکے۔ رقم نہ نکلنے کی صورت میں، اے ٹی ایم کو نہ چھوڑیں اور فوراً اپنے بینک سے رابطہ کریں۔ اگر مشین میں کوئی مشتبہ چیز نظر آئے تو اسے استعمال نہ کریں اور فوری طور پر بینک کو رپورٹ کریں۔

نیشنل سائبر کرائم انویسٹی گیشن ایجنسی کے حکام نے بینکوں کو مشورہ دیا ہے کہ وہ اپنے اے ٹی ایم پر "اینٹی کیش ٹریپنگ” ڈیوائسز نصب کریں اور مشینوں کی بروقت اپ گریڈیشن کریں۔ حکام کا کہنا ہے کہ جیسے جیسے جعلسازوں کی ٹیکنالوجی میں مہارت بڑھ رہی ہے، ویسے ویسے ان کی وارداتیں پیچیدہ ہوتی جا رہی ہیں۔ اس لیے بینکوں کو چاہیے کہ اے ٹی ایم کے سیکیورٹی پروٹوکولز کو مسلسل بہتر بنائیں اور صارفین کو اس فراڈ سے بچانے کے لیے آگاہی فراہم کریں۔