پراپرٹی مالکان کیلئے بڑی خوشخبری؛ حکومت کا اہم فیصلہ

پنجاب حکومت نے "پنجاب پروٹیکشن آف اونرشپ اینڈ موایبل پراپرٹی آرڈیننس 2025” کی منظوری دے دی ہے۔

 پنجاب پروٹیکشن آف اونرشپ اینڈ موایبل پراپرٹی آرڈیننس 2025 کے تحت پنجاب کے ہر ضلع میں ڈِسپیوٹ ریزولیشن کمیٹی قائم کی جائے گی، جو جائیداد پر قبضے کے تنازعات کو حل کرے گی۔ اس نظامِ انصاف کے مطابق اب لوگوں کو عدالت جانے سے پہلے اپنی نجی جائیداد پر قبضے کے مسائل کو ڈِسپیوٹ ریزولیشن کمیٹی کے ذریعے حل کرنا ہوگا۔

آرڈیننس کے تحت قبضے کے تمام کیسز کا فیصلہ اب صرف 90 دن کے اندر کمیٹی کی جانب سے کیا جائے گا۔ اگر کسی فریق کو فیصلہ پسند نہ آیا، تو وہ ہائی کورٹ کے ریٹائرڈ جج کی سربراہی میں قائم خصوصی ٹربیونل میں اپیل کر سکے گا۔ خصوصی ٹربیونل بھی 90 دن کے اندر اپیل کا فیصلہ سنانے کا پابند ہوگا۔

وزیراعلیٰ پنجاب مریم نواز کی زیر صدارت ایک اجلاس میں عوامی جائیدادوں پر قبضہ کرنے والوں کے خلاف سخت اقدامات کا جائزہ لیا گیا۔ اس اجلاس میں پیرا فورس کی خدمات حاصل کرنے کی تجویز بھی زیر غور آئی، تاکہ قبضہ مافیا کے خلاف موثر کارروائیاں کی جا سکیں۔ مزید یہ کہ شفافیت کو یقینی بنانے کے لیے ڈیجیٹل ریکارڈ رکھنے اور سوشل میڈیا پر لائیو اسٹریمنگ کی تجاویز پر بھی غور کیا گیا۔

وزیراعلیٰ مریم نواز نے اس موقع پر کہا کہ "جس کی ملکیت، اسی کا حق ہے۔ قبضہ مافیا کا باب ہمیشہ کے لیے بند کر دیا ہے۔ پنجاب میں اب کوئی کسی کی زمین نہیں چھینے گا۔” انہوں نے کہا کہ "عام آدمی کے لیے زمین یا جائیداد اس کی کل کائنات ہوتی ہے، اور قبضہ مافیا اسے چھین لیتا ہے، لیکن اب ایسا نہیں ہوگا۔”