سونا خریدنے اور بیچنے والوں کیلئے بڑی خبر آگئی

عالمی مالیاتی ادارے مورگن اسٹینلی نے سونے کی قیمتوں کے بارے میں نئی پیش گوئی جاری کردی۔

رپورٹ کے مطابق آنے والے سالوں میں سونے کی قیمت میں بڑا اضافہ ہوسکتا ہے۔ تجزیے میں کہا گیا ہے کہ 2026 کے وسط تک سونا 4 ہزار 500 ڈالر فی اونس تک جا سکتا ہے۔ اس وقت عالمی مارکیٹ میں سونا تقریباً 4 ہزار ڈالر فی اونس کے قریب ہے۔

رپورٹ میں بتایا گیا کہ عالمی حالات غیر یقینی ہیں، اسی لیے سرمایہ کار سونا خرید رہے ہیں۔ مرکزی بینکوں اور ای ٹی ایف فنڈز کی جانب سے بڑھتی ہوئی خریداری بھی قیمتوں میں اضافے کی اہم وجہ قرار دی گئی ہے۔

مزید کہا گیا کہ گزشتہ کچھ ہفتوں میں قیمتوں میں معمولی کمی آئی، جس سے مارکیٹ میں استحکام پیدا ہوا۔ ادارے کے مطابق جیسے ہی عالمی سطح پر شرح سود میں کمی ہوگی، ای ٹی ایف میں سرمایہ کاری مزید بڑھ سکتی ہے، اور مرکزی بینک بھی خریداری جاری رکھیں گے۔

تاہم رپورٹ میں خبردار کیا گیا کہ اگر مرکزی بینکوں نے اپنے ذخائر کم کیے تو قیمتوں میں دباؤ آ سکتا ہے۔ عالمی مارکیٹ میں اس سال سونے کی قیمتوں میں تقریباً 54 فیصد اضافہ دیکھا گیا ہے۔ اکتوبر 2025 میں سونا 4,381 ڈالر فی اونس کی بلند سطح پر گیا، جس کے بعد کچھ کمی ریکارڈ ہوئی۔

دیگر عالمی بینک بھی سونے کی قیمتوں کے حوالے سے پرامید ہیں۔ بینک آف امریکا نے 2026 کے لیے سونے کی قیمت 5 ہزار ڈالر فی اونس تک جانے کا امکان ظاہر کیا ہے۔ اسی طرح جے پی مورگن، سوسائٹی جنرالی اور گولڈمین ساکس نے بھی مستقبل میں مزید اضافہ ممکن قرار دیا ہے۔

ماہرین کا کہنا ہے کہ اگر عالمی تناؤ برقرار رہا اور مرکزی بینکوں نے خریداری جاری رکھی تو آنے والے دو سال سونے کے لیے مضبوط ثابت ہوسکتے ہیں۔