وزیرخزانہ نے معاشی استحکام اور اصلاحات کی خوشخبری سنادی

وفاقی وزیرخزانہ محمد اورنگزیب نے کہا ہے کہ ملک میں میکرو اکنامک استحکام میں واضح بہتری آئی ہے۔ انہوں نے بتایا کہ معاشی استحکام ملک کو پائیدار ترقی کی طرف لے جا رہا ہے۔

ایف بی آر ہیڈ کوارٹرز میں پریس کانفرنس کے دوران وزیرخزانہ نے کہا کہ حکومت بنیادی اصلاحات کر رہی ہے۔ تین عالمی ریٹنگ ایجنسیاں بھی اس بات کی تصدیق کر چکی ہیں کہ ملک کی معاشی سمت درست ہے۔

انہوں نے بتایا کہ ٹیکس نظام، توانائی اور دیگر شعبوں میں اصلاحات کی جا رہی ہیں۔ پنشن اصلاحات اور رائٹ سائزنگ بھی بنیادی اصلاحات کا حصہ ہیں۔ آئی ایم ایف کے ساتھ اسٹاف لیول معاہدہ بھی ہو چکا ہے۔

چئیرمین ایف بی آر راشد محمود لنگڑیال نے کہا کہ حالیہ سال میں انفرادی ٹیکس گوشوارے جمع کرانے والوں کی تعداد میں 18 فیصد اضافہ ہوا ہے۔ اب ٹیکس ریٹرنز کی تعداد 49 لاکھ سے بڑھ کر 59 لاکھ ہو گئی ہے۔ انہوں نے کہا کہ انکم ٹیکس گیپ 1.7 ٹریلین روپے ہے اور ٹیکس اصلاحات میں وقت درکار ہوتا ہے۔

وزیرتوانائی اویس لغاری نے بتایا کہ وزیراعظم کی خواہش ہے کہ بجلی کی قیمتیں کم کی جائیں۔ توانائی کے شعبے کو جدید خطوط پر استوار کیا جا رہا ہے۔ گزشتہ 18 ماہ میں بجلی کی قیمت میں ساڑھے 10 فیصد کمی کی گئی ہے۔ اب حکومت براہ راست بجلی نہیں خریدے گی۔ انہوں نے کہا کہ ایک سال میں گردشی قرضوں میں 700 ارب روپے کی کمی لائی گئی ہے۔

مشیر برائے نجکاری نے کہا کہ نجکاری کے عمل میں تیزی آئے گی۔ وزیراعظم نجکاری کے لیے مکمل پرعزم ہیں۔ نجکاری کمیشن کی استعداد بڑھائی جا رہی ہے۔ فرسٹ ویمن بینک پانچ ارب روپے میں فروخت کیا گیا۔ حکومت نجکاری کے عمل میں شفافیت یقینی بنا رہی ہے۔