سولر صارفین کی موجیں ختم؛ حکومت نے اہم فیصلہ کرلیا

پاکستان میں سولر نیٹ میٹرنگ کے بڑھتے ہوئے رجحان کے پیش نظر بجلی تقسیم کار کمپنیوں (DISCOs) نے سولر صارفین پر فکسڈ چارجز عائد کرنے کی تیاری شروع کر دی ہے۔

 ملتان الیکٹرک پاور کمپنی (میپکو) اور گوجرانوالہ الیکٹرک پاور کمپنی (گیپکو) نے اس بابت نیپرا (NEPRA) سے باقاعدہ منظوری کی درخواست کی ہے۔ ان کمپنیوں کا کہنا ہے کہ سولر نیٹ میٹرنگ کے ذریعے بجلی فروخت کرنے والے صارفین کی تعداد میں اضافہ ہو رہا ہے جس سے ان کی آمدنی میں کمی آ رہی ہے۔ دونوں کمپنیاں نیپرا کے سامنے اس بات کی تجویز بھی پیش کر چکی ہیں کہ سولر صارفین سے بھی ٹرانسمیشن اور ڈسٹری بیوشن کے اخراجات کی مد میں فیس وصول کی جائے۔

اس تجویز کی حمایت وزارتِ توانائی نے بھی کی ہے، جس کا کہنا ہے کہ سولر صارفین پر فکسڈ چارجز عائد کرنے سے پاور کمپنیوں کو نظام کی لاگت پورا کرنے میں مدد ملے گی۔ وزارت توانائی کا یہ موقف ہے کہ سولر توانائی کا استعمال بڑھنے سے نیشنل گرڈ کی آمدنی میں کمی آ رہی ہے، اور اس پر قابو پانے کے لیے فکسڈ چارجز ضروری ہیں۔

یہ پیشرفت اس وقت ہو رہی ہے جب ملک میں بجلی کی طلب میں کمی اور گیس کے اضافی سپلائی جیسے مسائل بڑھ رہے ہیں۔ ماہرین کے مطابق بجلی کی قیمتوں میں اضافے کی وجہ سے صارفین بڑی تعداد میں سولر توانائی کی طرف منتقل ہو رہے ہیں۔

 اس سے قبل حکومت نے سولر نیٹ میٹرنگ پالیسی میں تبدیلی کی کوشش کی تھی، جس کے تحت سولر صارفین سے بجلی خریدنے کی قیمت 10 روپے فی یونٹ کرنے کی تجویز دی گئی تھی، لیکن عوامی دباؤ کے باعث وزیراعظم شہباز شریف نے یہ تجویز مسترد کر دی تھی۔

نیپرا میں ہونے والی سماعت کے دوران میپکو اور گیپکو نے 2025-26 سے 2029-30 تک کی ملٹی ایئر ٹیرف درخواستوں پر بھی بات کی۔ کمپنیوں کا کہنا تھا کہ فکسڈ چارجز کے نفاذ سے ان کی مالی صورتحال مستحکم ہو جائے گی۔ تاہم پاور ڈویژن نے خبردار کیا کہ کیپیسٹی چارجز کا بوجھ نیشنل گرڈ سے جڑے صارفین پر منتقل ہو رہا ہے، جس سے ان کے اخراجات میں اضافہ ہو رہا ہے۔

نیپرا نے سماعت کے دوران سولر صارفین کی جانب سے ادائیگی میں تاخیر اور گیپکو کی غیرقانونی ایڈوانسڈ میٹرنگ انسٹالیشنز پر بھی تشویش کا اظہار کیا۔ میپکو نے رپورٹ کیا کہ مالی سال 2024-25 کے لیے 100 فیصد ریکوری ٹارگٹ حاصل کیا گیا ہے، تاہم کچھ بل شدہ رقم عموماً بعد میں وصول کی جاتی ہے۔

حکومت نے حال ہی میں ایک تین سالہ رعایتی منصوبہ متعارف کرایا ہے جس کے تحت زیادہ بجلی استعمال کرنے والے صارفین کو کم نرخ پر بجلی فراہم کی جا رہی ہے تاکہ سولر سسٹمز کی طرف منتقلی کے رجحان کو روکا جا سکے اور نیشنل گرڈ کی طلب میں اضافہ کیا جا سکے۔