بجلی کے بھاری بلوں سے پریشان عوام کیلئے بڑی خوشخبری آگئی

وزیرِ قانون اعظم نذیر تارڑ نے عوام کو خوشخبری دیتے ہوئے کہا کہ صارفین کو جلد ہی بجلی کے نرخوں میں کمی نظر آئے گی۔

 وزیرِ قانون اعظم نذیر تارڑ نے قومی اسمبلی کے اجلاس میں توانائی پالیسی اور سولرائزیشن منصوبے پر تفصیل سے گفتگو کی۔ ان کے مطابق وزیرِ اعظم شہباز شریف نے سولرائزیشن منصوبے پر اپنا مؤقف واضح کر دیا ہے اور اس منصوبے کے لیے حکومت نے بڑی رقم مختص کی ہے، جس پر عملدرآمد بھی جاری ہے۔

اعظم نذیر تارڑ نے کہا کہ حکومت عوام دوست توانائی پالیسی پر قائم ہے اور کابینہ نے ہر بار نیٹ میٹرنگ ختم کرنے کی تجویز کو مسترد کر دیا ہے۔ انہوں نے بتایا کہ آئی پی پیز سے متعلق احکامات بھی جاری کیے جا چکے ہیں اور ان پر عمل درآمد بھی ہو رہا ہے۔

وزیرِ قانون نے کہا کہ حکومت کی کوششوں کی بدولت بجلی کے نرخ 50 روپے فی یونٹ سے کم ہو کر 32 سے 35 روپے فی یونٹ تک آ گئے ہیں۔ ان کے مطابق عوام کو بہت جلد بجلی کے نرخوں میں مزید تبدیلی محسوس ہوگی۔

اعظم نذیر تارڑ نے کہا کہ وہ "ہاؤس کے جذبات کابینہ میں پیش کریں گے” اور انشااللہ عوام کا مقدمہ بھرپور انداز میں لڑیں گے۔ ان کا کہنا تھا کہ عوام کے مفاد کے لئے ان کی آواز حکومت میں پہنچائی جائے گی۔

واضح رہے کہ حکومت نے نیٹ میٹرنگ کی قیمت 10 روپے فی یونٹ مقرر کرنے کی تجویز دی تھی، لیکن عوامی ردعمل کے بعد وزیرِ اعظم شہباز شریف نے اس تجویز کو مسترد کر دیا تھا۔ اس کے علاوہ سماعت کے دوران نیپرا نے گیپکو کی غیر قانونی ایڈوانسڈ میٹرنگ انسٹالیشنز اور سولر صارفین کو ادائیگیوں میں تاخیر پر بھی تشویش کا اظہار کیا۔

حکومت کی حالیہ پالیسی کے تحت زیادہ بجلی استعمال کرنے والے صارفین کو رعایتی نرخ فراہم کیے جا رہے ہیں تاکہ سولر کی طرف بڑھتے ہوئے رجحان کو روکا جا سکے اور نیشنل گرڈ کی طلب میں اضافہ کیا جا سکے۔