گاڑی کی رجسٹریشن کروانے والوں کی بڑی مشکل آسان ہوگئی

پنجاب حکومت نے شہریوں کے لیے گاڑیوں کے منفرد اور دلکش نمبر حاصل کرنے کی آن لائن رجسٹریشن کا آغاز کر دیا ہے۔

 محکمہ ایکسائز، ٹیکسیشن اینڈ نارکوٹکس کنٹرول پنجاب نے یہ نظام پنجاب انفارمیشن ٹیکنالوجی بورڈ (PITB) کے تعاون سے تیار کیا ہے۔ اس جدید نظام کے تحت شہری اپنی پسند کا نمبر ای آکشن ایپ یا ویب پورٹل کے ذریعے حاصل کر سکتے ہیں۔

یہ سہولت 3 نومبر سے فعال ہو چکی ہے اور دلچسپی رکھنے والے شہری 30 نومبر تک رجسٹریشن کرا کے نیلامی میں حصہ لے سکتے ہیں۔ اس ڈیجیٹل نظام کا مقصد شفافیت، آسانی اور جدیدیت کو فروغ دینا ہے۔

محکمہ ایکسائز کے مطابق کاروں اور موٹر سائیکلوں دونوں کے رجسٹریشن نمبرز کی نیلامی آن لائن کی جا رہی ہے۔ کامیاب بولی دہندگان کی تفصیلات ای آکشن ایپ پر عوامی طور پر دیکھی جا سکتی ہیں۔

چیئرمین پی آئی ٹی بی فیصل یوسف نے بتایا کہ نیا نظام مکمل طور پر ڈیجیٹل بنایا گیا ہے، جس کے ذریعے شہری بغیر دفتر آئے اپنے پسندیدہ نمبر کے لیے درخواست دے سکتے ہیں۔ ان کا کہنا تھا کہ ای آکشن سسٹم نے پورے عمل کو نہ صرف شفاف بلکہ تیز رفتار بھی بنا دیا ہے۔

ماہرین کے مطابق خوبصورت اور منفرد نمبر پلیٹس حاصل کرنے کا رجحان تیزی سے بڑھ رہا ہے۔ کچھ لوگ ایسے نمبرز منتخب کرتے ہیں، جیسے 786 یا اپنی تاریخ پیدائش، جب کہ کئی افراد ان سے مختلف نمبرز کا انتخاب کرتے ہیں۔

یہ منفرد نمبرز محدود ہوتے ہیں، اسی لیے ان کی قیمت زیادہ اور طلب نمایاں ہوتی ہے۔ ایک خوبصورت نمبر پلیٹ آج کل نہ صرف فیشن بلکہ “اسٹیٹس سمبل” بھی بن چکی ہے۔