حمیرا اصغر کی موت طبعی، قتل یا خودکشی؟ موبائل سے اہم دیٹا مل گیا

پولیس کو اداکارہ حمیرا اصغر کے موبائل سے اہم دیٹا مل گیا۔

کراچی کے علاقے ڈیفنس فیز 6 میں اپنے فلیٹ میں مردہ پائی جانے والی اداکارہ حمیرا اصغر کے معاملے میں پولیس نے اہم پیش رفت کرتے ہوئے ان کے استعمال شدہ الیکٹرانک آلات سے ڈیٹا حاصل کر لیا ہے۔

 ایس ایس پی ساؤتھ مہزور علی کی ہدایت پر ایس پی کلفٹن عمران علی جاگرانی کی سربراہی میں ایک چھ رُکنی تحقیقاتی کمیٹی تشکیل دی گئی ہے جو حمیرا اصغر کی موت کے اسباب کا تعین کرے گی کہ آیا یہ طبعی موت ہے، حادثہ، خودکشی یا قتل کا واقعہ ہے۔

تفتیشی ٹیم نے اداکارہ کے تین موبائل فونز، ایک ٹیبلٹ اور لیپ ٹاپ تک رسائی حاصل کر کے ان کے پاسورڈز بھی حاصل کر لیے ہیں جو اداکارہ کی ڈائری میں محفوظ تھے۔ پولیس ان ڈیجیٹل آلات میں موجود ڈیٹا اور چیٹ کا بغور تجزیہ کر رہی ہے اور اس کی مدد سے مزید سراغ لگانے کی کوششیں تیز کر دی گئی ہیں۔

اب تک دو افراد کے بیانات بھی ریکارڈ کیے جا چکے ہیں، جبکہ مرحومہ کے رہائشی پروجیکٹ کے چوکیدار اور صفائی کا کام کرنے والے سمیت دیگر متعلقہ افراد سے بھی پوچھ گچھ کی گئی ہے۔

تفتیش کاروں کا کہنا ہے کہ حمیرا اصغر باقاعدگی سے جِم اور بیوٹی پارلر جاتی تھیں، اس لیے ان کے جِم ٹرینر اور دیگر متعلقہ افراد سے بھی رابطے کیے جا رہے ہیں۔

 پولیس نے انکشاف کیا ہے کہ مرحومہ کا کچھ مخصوص افراد سے مسلسل رابطہ رہا، جن کی تفصیلات بھی جمع کی جا رہی ہیں۔ اس کے علاوہ ان کے بینک اکاؤنٹس کی بھی جانچ پڑتال کی جا رہی ہے تاکہ کسی بھی مشتبہ مالی لین دین کا پتہ چلایا جا سکے۔

یاد رہے کہ حمیرا اصغر کے اہلِ خانہ نے اب تک اس واقعے میں قانونی کارروائی کے لیے پولیس سے رابطہ نہیں کیا ہے۔