ہفتہ، 29-نومبر،2025
ہفتہ 1447/06/08هـ (29-11-2025م)

حمیرا اصغر کی پراسرار موت خودکشی ہے یا سازش؟ بھابی کا چشم کشا انکشاف

15 جولائی, 2025 14:19

اداکارہ حمیرا اصغر کی پراسرار موت سے متعلق بھابی نے چشم کشا انکشاف کردیا ہے۔  

کراچی کے پوش علاقے ڈیفنس فیز 6 کے ایک فلیٹ سے مردہ حالت میں ملنے والی نوجوان اداکارہ حمیرا اصغر کی موت کا معاملہ مزید سنگین اور سنسنی خیز رخ اختیار کر چکا ہے۔ واقعے میں کئی ایسے پہلو سامنے آئے ہیں جو محض خودکشی نہیں، بلکہ ایک ممکنہ قتل کی طرف اشارہ کرتے ہیں۔ اداکارہ کے اہل خانہ کی خاموشی، پولیس کی ابتدائی تفتیش اور ان کی زندگی کی آخری فون کال نے معاملے کو مزید پراسرار بنا دیا ہے۔

حمیرا اصغر کی بھابھی ہما سہیل نے ایک نجی ٹی وی چینل سے گفتگو کرتے ہوئے انکشاف کیا کہ حمیرا نے اپنی آخری کال میں شدید ذہنی دباؤ اور مالی پریشانی کا اظہار کیا تھا۔ اُن کا کہنا تھا کہ اداکارہ نے والدہ سے مالی مدد مانگی، لیکن انکار کر دیا گیا۔ ہما کے مطابق حمیرا عموماً دل کی بات کسی سے شیئر نہیں کرتی تھی، مگر اُس دن کی گفتگو بے حد بےبسی سے بھرپور تھی۔

زیادہ حیران کن امر یہ ہے کہ جب حمیرا کئی ماہ تک لاپتہ رہی، تب نہ والد اور نہ ہی بھائی نے پولیس سے رابطہ کیا۔ حتیٰ کہ لاش کی شناخت کے بعد بھی خاندان نے اسے وصول کرنے سے انکار کر دیا۔ ہما سہیل نے بتایا کہ انہوں نے آٹھ ماہ قبل خود پولیس سے رابطہ کیا تھا، مگر صرف اس وجہ سے ان کی بات کو سنجیدگی سے نہیں لیا گیا کہ وہ حمیرا کی بلڈ ریلیشن نہیں تھیں۔

اداکارہ کی بھابھی نے اس تاثر کو بھی مسترد کر دیا کہ حمیرا نے خودکشی کی۔ ان کا کہنا تھا کہ "وہ خود سے بے حد محبت کرتی تھی، وہ ایسا قدم کبھی نہیں اٹھا سکتی۔ سوال یہ ہے کہ فلیٹ کی کھڑکی کھلی کیسے تھی؟” ان کے مطابق واقعے کے کئی پہلو مشکوک ہیں اور شواہد ایک منصوبہ بند سازش کی طرف اشارہ کرتے ہیں۔

اداکارہ کی گمشدگی کے دوران محلے داروں اور قریبی افراد کی خاموشی بھی سوالات کو جنم دے رہی ہے۔ کسی نے بھی پولیس سے رابطہ کیا، نہ سوشل میڈیا پر آواز اٹھائی، جس سے شکوک مزید گہرے ہو رہے ہیں کہ آخر اداکارہ کن حالات سے گزر رہی تھی۔

دوسری جانب پولیس نے واقعے کی مزید تفتیش کا آغاز کر دیا ہے۔ فرانزک اور میڈیکل رپورٹس کا انتظار کیا جا رہا ہے، جس کے بعد ہی یہ طے ہو سکے گا کہ یہ واقعی خودکشی کا واقعہ تھا یا حمیرا اصغر کو کسی سوچی سمجھی سازش کے تحت قتل کیا گیا۔

Catch all the انٹرٹینمنٹ News, Breaking News Event and Trending News Updates on GTV News


Join Our Whatsapp Channel GTV Whatsapp Official Channel to get the Daily News Update & Follow us on Google News.

اوپر تک سکرول کریں۔