بھارت کے لیجنڈری اداکار 79 برس کی عمر میں انتقال کرگئے

معروف بھارتی اداکار، پروڈیوسر اور ڈائریکٹر دھیرج کمار 79 برس کی عمر میں ممبئی کے اسپتال میں انتقال کر گئے۔

 خاندانی ذرائع کے مطابق ان کا انتقال منگل کی صبح 11:40 بجے ہوا، اس موقع پر ان کے بیٹے اشوتوش کمار ان کے ہمراہ تھے۔ طبی حکام کے مطابق دھیرج کمار کو شدید نمونیا لاحق تھا اور وہ آئی سی یو میں وینٹی لیٹر پر زیرِ علاج تھے۔

 رپورٹ کے مطابق انہیں دل کا دورہ پڑا جس کے باعث وہ جانبر نہ ہو سکے۔ اسپتال حکام نے بتایا کہ ضروری کاغذی کارروائی میں دو سے تین گھنٹے لگیں گے، جب کہ ان کی تدفین رشتہ داروں کی پنجاب سے آمد کے بعد کل متوقع ہے۔

دھیرج کمار کے اہلِ خانہ کی جانب سے جاری کردہ بیان میں کہا گیا ہے کہ وہ ایک ممتاز فنکار، ہدایتکار اور پروڈیوسر تھے، جنہوں نے فلم و ٹی وی انڈسٹری میں گراں قدر خدمات سرانجام دیں۔ ان کے انتقال سے شوبز انڈسٹری ایک باصلاحیت شخصیت سے محروم ہو گئی ہے۔

دھیرج کمار نے 1965 میں شوبز انڈسٹری میں قدم رکھا اور ایک مشہور ٹیلنٹ شو میں سبھاش گھائی اور راجیش کھنہ کے ساتھ فائنلسٹ رہے، جس میں راجیش کھنہ فاتح قرار پائے تھے۔ دھیراج کمار نے 1970 سے 1984 کے درمیان 21 پنجابی فلموں میں اداکاری کے جوہر دکھائے۔

 انہوں نے ’کریئیٹو آئی‘ کے نام سے اپنی پروڈکشن کمپنی قائم کی، جس کے وہ چیئرمین اور منیجنگ ڈائریکٹر بھی تھے۔ ان کے مشہور فلمی کرداروں میں فلم ’سوامی‘ میں گیت ’کیا کروں ساجن، آئے نہ بالم‘ کی عکس بندی ان پر کی گئی، جب کہ ’ہیرا پنا‘ اور ’راتوں کا راجا‘ جیسی فلموں میں بھی ان کی اداکاری کو سراہا گیا۔