حمیرا اصغر کی موت طبعی تھی یا قتل؟ ڈی آئی جی ساؤتھ کراچی نے اہم انکشافات کردیئے

اداکارہ حمیرا اصغر کی موت پر ڈی آئی جی ساؤتھ کراچی نے خاموشی توڑ دی ہے۔  

کراچی کے پوش علاقے ڈیفنس فیز 6 کے اتحاد کمرشل میں واقع ایک فلیٹ سے پاکستانی ماڈل و اداکارہ حمیرا اصغر کی کئی ماہ پرانی لاش برآمد ہونے کے بعد پولیس نے واقعے کی باقاعدہ تحقیقات شروع کر دی ہیں۔ پولیس حکام کا کہنا ہے کہ اس افسوسناک واقعے کی تفتیش چار مختلف پہلوؤں سے کی جا رہی ہے، جن میں قتل، خودکشی، حادثاتی موت اور فطری موت شامل ہیں۔

ڈی آئی جی ساؤتھ اسد رضا نے نجی ٹی وی چینل سے گفتگو کرتے ہوئے بتایا کہ ابتدائی تحقیق کے مطابق حمیرا اصغر کی لاش تقریباً نو ماہ پرانی ہے، تاہم موت کی اصل وجہ کا تعین پوسٹ مارٹم رپورٹ آنے کے بعد ہی کیا جا سکے گا۔ پولیس کا کہنا ہے کہ فلیٹ سے اداکارہ کے زیر استعمال موبائل فونز، لیپ ٹاپ اور ذاتی ڈائری سے کوئی اہم شواہد نہیں مل سکے، تاہم تفتیش کے دائرہ کار کو وسیع کرتے ہوئے ایک فٹنس انسٹرکٹر سے رابطہ کیا گیا ہے تاکہ یہ معلوم کیا جا سکے کہ کیا حمیرا اصغر نے فٹنس برقرار رکھنے کے لیے کسی قسم کی ادویات کا استعمال تو نہیں کیا تھا۔

ڈی آئی جی کے مطابق جس فلیٹ سے اداکارہ کی لاش ملی، وہاں دروازوں پر اندر سے کنڈی نہیں لگی ہوئی تھی اور جو لاک موجود ہیں، وہ دونوں جانب سے لگائے جا سکتے ہیں۔ تاحال ایسا کوئی ثبوت نہیں ملا جس سے یہ ثابت ہو کہ دروازے باہر سے بند کیے گئے تھے۔

ڈی آئی جی ساؤتھ اسد رضا کا کہنا تھا کہ کسی لاش کے گلنے سڑنے کی بو 5 سے 40 دن تک ہوتی ہے تاہم اکتوبر سے فروری تک اداکارہ حمیرا کے برابر والے گھر میں رہنے والی فیملی بھی ملک سے باہر تھی جس سے ان کی موت کا معلوم نہیں ہوسکا۔

انہوں نے کہا کہ حمیرا اصغر کی لاش جس کمرے میں تھی اس میں گیلری جبکہ برابر والے کمرے میں واش روم کی کھڑکی بھی کھلی ہوئی تھی جس کی وجہ سے ممکن ہے کہ بو وقت کے ساتھ ختم ہوگئی ہو۔

اسد رضا کا کہنا تھا کہ ہمارے مطابق یہ واقعہ 7 اکتوبر 2024 کو پیش آیا کیونکہ اس کے 3 دن بعد ایک بار چوکیدار نے اداکارہ سے فون پر رابطہ کرنے کی کوشش کی تاہم کوئی جواب موصول نہیں ہوا جبکہ ان کی ایک سہیلی نے بھی انہیں کال کی مگر جواب نہیں ملا۔

 پولیس کا کہنا ہے کہ اگر حمیرا اصغر کے اہلِ خانہ کی جانب سے کوئی باضابطہ درخواست دی گئی تو مقدمہ درج کیا جائے گا، تاہم فی الوقت واقعہ بظاہر طبعی موت کا ہی لگتا ہے، مگر تمام پہلوؤں سے تحقیقات کی جا رہی ہیں۔

پولیس نے مزید بتایا کہ فلیٹ کے چوکیدار نے کچھ ماہ قبل بالائی منزل سے تعفن پھیلنے کی اطلاع دیگر مکینوں کو دی تھی، لیکن کسی نے اس پر سنجیدگی سے توجہ نہیں دی، جس کے باعث وقت پر واقعے کا علم نہ ہو سکا۔ حمیرا اصغر کی لاش 8 جولائی کو اس وقت ملی جب فلیٹ کے کرائے کی عدم ادائیگی پر مالک مکان کی درخواست پر عدالتی بیلف فلیٹ پر پہنچا۔

ابتدائی طور پر یہ قیاس کیا جا رہا تھا کہ لاش ایک سے دو ماہ پرانی ہے، تاہم بعد ازاں پوسٹ مارٹم رپورٹ میں انکشاف ہوا کہ اداکارہ کی موت 8 سے 10 ماہ قبل ہوئی تھی اور ان کی لاش گلنے سڑنے کے آخری مراحل میں تھی۔