حمیرا اصغر کے گھر سے پولیس کو موت سے قبل کے اہم شواہد مل گئے؛ تہلکہ خیز انکشافات سامنے آگئے

معروف اداکارہ حمیرا اصغر کی پراسرار موت کے حوالے سے پولیس کی تحقیقات جاری ہیں، جن میں اہم شواہد سامنے آئے ہیں۔

 تفتیشی حکام کے مطابق اداکارہ کے فلیٹ سے یوٹیلیٹی بلز اور مئی 2024 تک کے کرائے کی ادائیگی کی رسید ملی ہے، جبکہ یہ بھی دیکھا گیا ہے کہ موت سے قبل گھر میں کپڑے دھوئے گئے تھے۔

حکام کے مطابق حمیرا اصغر کی لاش بیڈروم سے ملحق کمرے میں موجود تھی۔ اس کمرے کے واش روم کے ٹب میں کپڑے پائے گئے، اور کمرے کی بالکونی کا دروازہ بھی کھلا ہوا تھا۔ پولیس کا کہنا ہے کہ فلیٹ کا مرکزی دروازہ اندر سے ڈبل لاک تھا، اور اصل وجہ موت کا تعین کیمیکل ایگزامینیشن اور میڈیکل رپورٹ کے بعد ہی ممکن ہوگا۔

تحقیقات سے یہ بات بھی سامنے آئی ہے کہ اداکارہ کی موت 7 اکتوبر 2024 کو ہوئی، جبکہ فلیٹ سے بدبو آنے کی شکایت پر پڑوسیوں نے دسمبر 2024 میں پولیس کو اطلاع دی تھی۔ پولیس نے بتایا کہ 8 جولائی 2025 کو عدالتی بیلف کرایہ کی عدم ادائیگی پر فلیٹ پر پہنچا، جہاں دروازہ نہ کھلنے پر توڑا گیا تو اندر سے اداکارہ کی لاش ملی۔

پوسٹ مارٹم کی ابتدائی رپورٹ کے مطابق لاش گلنے سڑنے کے آخری مرحلے میں تھی، جس سے اندازہ لگایا گیا کہ موت کو تقریباً آٹھ ماہ کا عرصہ گزر چکا ہے۔ پولیس کا کہنا ہے کہ تفتیش کا دائرہ مزید وسیع کیا گیا ہے تاکہ موت کی اصل وجہ اور اس سے جڑے ممکنہ محرکات کو واضح کیا جا سکے۔