حمیرا اصغر کی طبعی موت یا قتل؛ والدین نے پہلے انٹرویو میں متعدد حقائق سے پردہ اٹھادیا

اداکارہ حمیرا اصغر کے والدین نے بیٹی کی موت سے متعلق متعدد حقائق سے پردہ اٹھادیا۔

گزشتہ ہفتے کراچی کے علاقے ڈی ایچ اے کے ایک فلیٹ سے مردہ حالت میں ملنے والی اداکارہ حمیرا اصغر کے والدین نے پہلی بار میڈیا سے گفتگو کرتے ہوئے ان الزامات کو سختی سے مسترد کر دیا ہے کہ انہوں نے بیٹی کی لاش لینے سے انکار کیا تھا۔

 اداکارہ کی والدہ اور والد نے مقامی ٹی وی چینل سے گفتگو کرتے ہوئے کہا کہ بیٹیاں سب کو عزیز ہوتی ہیں، وہ حمیرا سے رابطے کی مسلسل کوشش کرتے رہے، تاہم ان کے فون نمبرز بند تھے۔ والدین کو امید تھی کہ بیٹی خود ہی کبھی رابطہ کرے گی۔

اداکارہ کے والد نے بتایا کہ وہ اپنے کلینک میں موجود تھے جب انہیں رشتہ داروں اور بعد ازاں سندھ پولیس کی جانب سے بیٹی کی موت کی اطلاع دی گئی۔ ان کا کہنا تھا کہ انہوں نے لاش لینے سے کبھی انکار نہیں کیا، بلکہ یہ سمجھا کہ جب تک قانونی کارروائیاں اور پوسٹ مارٹم مکمل نہیں ہوتا، تب تک لاش لینا ممکن نہیں۔ انہوں نے واضح کیا کہ اگر وہ لاش لینے سے انکار کرتے تو بعد میں اپنے بیٹے کو یہ ذمہ داری نہ سونپتے۔

اداکارہ کے والد نے بیٹی کی مالی تنگی کی خبروں کو بھی جھوٹ قرار دیا اور کہا کہ وہ اچھی کمائی کرتی تھیں اور اپنے پیسے نہ صرف خود پر خرچ کرتی تھیں بلکہ غریبوں، یتیم بچوں اور مستحقین پر بھی دل کھول کر خرچ کرتی تھیں۔ ان کے مطابق بیٹی کے کمرے سے قیمتی ملبوسات بھی ملے ہیں، جو اس بات کا ثبوت ہیں کہ وہ مالی مشکلات کا شکار نہیں تھیں۔

والد نے کہا کہ اگر کسی لڑکی کی آمدنی اچھی ہو تو گھر کا کرایہ یا بجلی کے بل ادا کرنا کوئی مشکل نہیں، ممکن ہے کہ بیٹی کی وفات کے بعد ہی یہ ادائیگیاں رک گئی ہوں۔ انہوں نے حمیرا کی موت پر شکوک و شبہات کا اظہار کرتے ہوئے کہا کہ انہیں لگتا ہے کہ بیٹی کے ساتھ کچھ غلط ہوا ہے، کیونکہ لاش اسٹور روم سے ملی اور گھر کی صورتحال بھی مشکوک تھی۔ انہوں نے سندھ پولیس کی تفتیش کو سراہتے ہوئے کہا کہ وہ غیر جانبداری سے معاملے کی چھان بین کر رہے ہیں۔

اداکارہ کی والدہ نے بھی پہلی بار گفتگو کرتے ہوئے بیٹی سے ناراضگی کی خبروں کو مسترد کیا اور کہا کہ انہوں نے ہی حمیرا کو شوبز میں جانے کی اجازت دی تھی۔ ان کا کہنا تھا کہ بیٹی سے آخری بار اگست 2024 کے آخر میں بات ہوئی تھی، جس کے بعد وہ مسلسل کال کرتی رہیں مگر نمبر بند ملا۔ انہوں نے بتایا کہ انہیں لگا کہ بیٹی بیرون ملک گئی ہوں گی اور جیسے ہی واپس آئیں گی، رابطہ کریں گی۔

والدہ کے مطابق بیٹی نے آخری بار بتایا تھا کہ انہیں تنگ کیا جا رہا ہے اور ان کی موبائل سمز بند کرا دی گئی ہیں، تاہم انہوں نے اس بات کی وضاحت نہیں کی کہ یہ سب کون کر رہا ہے۔ اداکارہ کی والدہ نے کہا کہ بیٹی کی موت کی خبر سے چند روز قبل ہی وہ عجیب گھبراہٹ محسوس کر رہی تھیں اور پھر اچانک یہ افسوسناک خبر ملی، جس نے انہیں صدمے میں ڈال دیا۔

واضح رہے کہ حمیرا اصغر کی لاش 8 جولائی کو کراچی کے ڈی ایچ اے میں ان کے کرائے کے فلیٹ سے ملی تھی، جہاں وہ 2018 سے رہائش پذیر تھیں۔ پولیس اور ابتدائی پوسٹ مارٹم رپورٹ کے مطابق ان کی موت تقریباً 10 ماہ قبل، اکتوبر 2024 کے اوائل میں واقع ہوئی تھی۔