وفاق نے گورنر سندھ کی تبدیلی پر اعتماد میں نہیں لیا، ایم کیو ایم پاکستان

متحدہ قومی موومنٹ پاکستان کا کہنا ہے کہ گورنر سندھ کی تبدیلی کا ذرائع ابلاغ کے ذریعے معلوم ہوا، وفاقی حکومت نے اس حوالے سے پارٹی کو اعتماد میں نہیں لیا۔

متحدہ قومی موومنٹ پاکستان نے گورنر سندھ کی تبدیلی کے حوالے سے ردعمل دیتے ہوئے کہا ہے کہ پارٹی کو اس فیصلے کے بارے میں پیشگی طور پر آگاہ نہیں کیا گیا۔

ترجمان متحدہ قومی موومنٹ پاکستان کا کہنا ہے کہ انہیں گورنر سندھ کی تبدیلی کی خبر ذرائع ابلاغ کے ذریعے معلوم ہوئی، جس پر پارٹی کے اندر مشاورت جاری ہے۔

یہ بھی پڑھیں : نہال ہاشمی کو گورنر سندھ تعینات کرنے کا فیصلہ

انہوں نے کہا کہ حکومت کی جانب سے ایسے فیصلوں میں اتحادی جماعتوں کو اعتماد میں لینا سیاسی روایت اور جمہوری اقدار کے مطابق ہونا چاہیے۔

ترجمان نے مزید کہا کہ گورنر سندھ کے عہدے کی تبدیلی ایک اہم انتظامی اور سیاسی معاملہ ہے اور اس حوالے سے اتحادی جماعتوں سے مشاورت ضروری ہوتی ہے۔

ان کا کہنا تھا کہ اگر حکومت اس طرح کے فیصلے بغیر مشاورت کے کرے گی تو اس سے سیاسی ماحول پر بھی اثرات مرتب ہو سکتے ہیں۔

متحدہ قومی موومنٹ پاکستان کے ترجمان نے واضح کیا کہ پارٹی اس صورتحال پر سنجیدگی سے غور کر رہی ہے اور جلد اپنا لائحہ عمل طے کرے گی۔ انہوں نے کہا کہ پارٹی کی قیادت اس معاملے پر مشاورت کے بعد آئندہ کی حکمت عملی کا اعلان کرے گی۔