دنیا کے سب سے پتلے اسمارٹ فون ’ٹیکنو اسپارک سلم‘ کی تفصیلات لیک ہوگئیں؛ کیا کیا خصوصیات ہیں؟ جانیے

دنیا کے سب سے پتلے اسمارٹ فون ’ٹیکنو اسپارک سلم‘ کی تفصیلات لیک ہوگئیں۔

ٹیکنو نے رواں سال فروری میں موبائل ورلڈ کانگریس (MWC) کے دوران اپنے انتہائی پتلے اسمارٹ فون "اسپارک سلم” کے کانسیپٹ ماڈل کو پیش کیا تھا، جس نے 5.75 ملی میٹر موٹائی کے باعث ٹیکنالوجی کے شوقین افراد کی خاص توجہ حاصل کی۔

اس ڈیوائس کو سام سنگ کے گلیکسی S25 ایج اور ایپل کے ممکنہ آئی فون 17 ایئر کا مدمقابل قرار دیا گیا تھا۔ تاہم جہاں سام سنگ اپنا نیا فلیگ شپ فون پہلے ہی مارکیٹ میں پیش کر چکا ہے، وہیں ٹیکنو کا متوقع ماڈل تاحال مارکیٹ سے غائب ہے۔

اب ایک تازہ لیک میں دعویٰ کیا گیا ہے کہ اسپارک سلم کی موٹائی 5.95 ملی میٹر ہوگی، جو ابتدائی کانسیپٹ سے معمولی سی زیادہ ہے۔ فون میں 6.78 انچ کا AMOLED ڈسپلے متوقع ہے، جو 144 ہرٹز کے ریفریش ریٹ کے ساتھ ایک ہموار اور جدید تجربہ فراہم کرے گا۔

فون کی پشت پر 50 میگا پکسل کا مین کیمرہ دیے جانے کا امکان ہے، جبکہ اسے 5,200 ایم اے ایچ بیٹری کے ساتھ پیش کیے جانے کی افواہیں ہیں، جو صارفین کو بہتر بیٹری لائف فراہم کرے گی۔

ذرائع کے مطابق ٹیکنو اس ڈیوائس کو مختلف رنگوں میں پیش کرنے کا ارادہ رکھتا ہے تاکہ عالمی صارفین کی توجہ حاصل کی جا سکے۔ کمپنی کی جانب سے اسمارٹ فون کی باضابطہ لانچنگ کے لیے تیاریاں جاری ہیں اور آئندہ دنوں میں مزید تفصیلات سامنے آنے کی توقع ہے۔