پی ٹی اے نے موبائل فون صارفین کو بڑی خوشخبری سنادی

پاکستان ٹیلی کمیونیکیشن اتھارٹی (پی ٹی اے) نے موبائل صارفین سے بغیر منظوری اضافی ٹیرف وصول کرنے کی خبروں کو مسترد کرتے ہوئے انہیں گمراہ کن قرار دے دیا ہے۔

پاکستان ٹیلی کمیونیکیشن اتھارٹی کی جانب سے جاری بیان میں کہا گیا ہے کہ سوشل میڈیا پر گردش کرنے والی اطلاعات کے مطابق یہ تاثر دیا جا رہا ہے کہ مالی سال 2023-24 کے دوران موبائل نیٹ ورک "جاز” نے پی ٹی اے کی منظوری کے بغیر اپنے صارفین سے اضافی چارجز وصول کیے، جو کہ درست نہیں۔

پی ٹی اے ترجمان نے واضح کیا کہ اتھارٹی کے پاس اس نوعیت کی کسی اوور چارجنگ کا کوئی ثبوت یا واقعہ موجود نہیں ہے۔ ترجمان کے مطابق آڈیٹر جنرل آف پاکستان کی رپورٹ میں جن ٹیرف ایڈجسٹمنٹس کا ذکر کیا گیا ہے، وہ تمام اتھارٹی کے مقرر کردہ ریگولیٹری فریم ورک کے تحت باضابطہ منظوری کے بعد نافذ کیے گئے تھے۔

مزید وضاحت دیتے ہوئے کہا گیا کہ ان تمام منظوریوں کا مستند ریکارڈ آڈٹ حکام کے ساتھ تصدیق کے لیے شیئر کیا جا چکا ہے۔ پی ٹی اے نے یقین دہانی کروائی ہے کہ وہ صارفین کے حقوق کے تحفظ اور شفاف و منصفانہ ٹیلی کام سروسز کی فراہمی کے لیے پرعزم ہے۔

بیان میں یہ بھی کہا گیا کہ اتھارٹی تمام ٹیلی کام آپریٹرز کے ٹیرف پر مسلسل نظر رکھے ہوئے ہے تاکہ ریگولیٹری تقاضوں پر مکمل عملدرآمد یقینی بنایا جا سکے اور کسی بھی غیر منصفانہ کاروباری عمل کی روک تھام کی جا سکے۔