آئی فون صارفین کیلئے بڑی خوشخبری؛ واٹس ایپ کا اہم اعلان

واٹس ایپ نے آئی فون استعمال کرنے والے صارفین کے لیے نیا فیچر متعارف کروا دیا ہے۔

مقبول میسجنگ ایپ واٹس ایپ نے آئی فون استعمال کرنے والے صارفین کے لیے اسٹیٹس اپ ڈیٹ کرنے کا عمل مزید آسان بنانے کی غرض سے نیا اور زبردست فیچر متعارف کروا دیا ہے۔ میڈیا رپورٹس کے مطابق واٹس ایپ کی جانب سے iOS صارفین کے لیے نئی اپ ڈیٹ جاری کی گئی ہے جو ایپ اسٹور پر ورژن 25.22.83 کے تحت دستیاب ہے۔

اس اپ ڈیٹ میں "My Status” کا شارٹ کٹ نمایاں طور پر شامل کیا گیا ہے، جس کے ذریعے صارفین اب بغیر ایپ کھولے، براہ راست تصاویر یا ویڈیوز اپنے واٹس ایپ اسٹیٹس پر پوسٹ کر سکتے ہیں۔ اس سے قبل صارفین کو اسٹیٹس اپ ڈیٹ کرنے کے لیے متعدد مراحل سے گزرنا پڑتا تھا، تاہم اب یہ عمل کہیں زیادہ تیز اور سہل بنا دیا گیا ہے۔

واٹس ایپ کے مطابق آئی فون صارفین اب کسی بھی دوسری ایپلیکیشن سے تصویر یا ویڈیو منتخب کر کے شیئر مینو سے براہ راست "My Status” بٹن کو منتخب کر سکتے ہیں، جو فوراً ہی میڈیا کو واٹس ایپ کے اسٹیٹس ایڈیٹر میں منتقل کر دے گا۔ اس فیچر کی بدولت صارفین بغیر کسی رکاوٹ کے فوری طور پر اپنی تصاویر یا ویڈیوز شیئر کر سکتے ہیں۔

یہ نیا فیچر فی الحال محدود آئی فون صارفین کے لیے دستیاب ہے، تاہم کمپنی کا کہنا ہے کہ آئندہ چند ہفتوں میں یہ سہولت تمام iOS صارفین کو اپ ڈیٹ کے ذریعے فراہم کر دی جائے گی۔ یہ اپ گریڈ واٹس ایپ کے یوزر ایکسپیرینس کو مزید بہتر بنانے کی جانب ایک اہم قدم تصور کیا جا رہا ہے۔