فیس بک اکاؤنٹ ہیک ہوجانے کی صورت میں کیا کرنا چاہیے؟ جانیے

فیس بک اکاؤنٹس ہیک ہونے کے واقعات میں مسلسل اضافہ دیکھا جا رہا ہے، جو ہر صارف کے لیے باعثِ تشویش بن چکا ہے۔

 معروف جریدے ‘فوربز’ کے مطابق ہیکرز جب کسی صارف کے لاگ اِن ڈیٹا اور ذاتی معلومات تک رسائی حاصل کر لیتے ہیں تو وہ نہ صرف اکاؤنٹ پر مکمل کنٹرول حاصل کر لیتے ہیں بلکہ صارف کو لاگ اِن سے بھی باہر کر دیتے ہیں۔

اس کے بعد یہ ہیکرز متاثرہ صارف کے نام سے اس کے دوستوں اور خاندان والوں کو جعلی پیغامات بھیج کر مالی دھوکہ دہی، بلیک میلنگ اور فراڈ میں ملوث ہو سکتے ہیں۔ اگر صارف نے یہی پاس ورڈ دیگر ویب سائٹس یا بینکنگ سروسز میں بھی استعمال کر رکھا ہو تو ہیکرز کو مزید حساس معلومات تک رسائی حاصل ہو سکتی ہے۔

ماہرین کا کہنا ہے کہ اگر آپ کو شبہ ہو کہ آپ کا فیس بک اکاؤنٹ ہیک ہو چکا ہے تو فوری طور پر چند حفاظتی اقدامات ضروری ہیں۔ سب سے پہلے ہیکنگ کی علامات پر نظر رکھیں، جیسے کہ لاگ اِن کی کوشش میں ناکامی، پروفائل فوٹو، تاریخِ پیدائش یا لوکیشن میں غیرمتوقع تبدیلی، یا دوستوں کو موصول ہونے والے مشکوک پیغامات۔

اگر آپ کا اکاؤنٹ ہیک ہو چکا ہو اور آپ لاگ اِن نہیں کر پا رہے، تو فیس بک کے مخصوص ہیلپ پیج کے ذریعے اکاؤنٹ ریکور کیا جا سکتا ہے، جو عمومی طور پر چند دنوں میں حل ہو جاتا ہے۔ اگر آپ اب بھی اکاؤنٹ تک رسائی رکھتے ہیں تو فوراً سیٹنگز میں جا کر ’پاس ورڈ اور سیکیورٹی‘ سیکشن کھولیں، وہاں موجود لاگ اِن ڈیوائسز کا جائزہ لیں، مشکوک ڈیوائسز کو لاگ آؤٹ کریں اور نیا مضبوط پاس ورڈ سیٹ کریں۔

ماہرین مزید تجویز کرتے ہیں کہ اگر آپ نے ایک ہی پاس ورڈ مختلف ویب سائٹس پر استعمال کر رکھا ہے تو فوری طور پر تمام پاس ورڈز تبدیل کریں۔ ایک مضبوط پاس ورڈ میں بڑے اور چھوٹے حروف، اعداد اور خاص علامات شامل ہونی چاہئیں، اور بہتر سیکیورٹی کے لیے پاس ورڈ مینیجر استعمال کرنا مفید رہتا ہے۔

اکاؤنٹ کی بازیابی کے بعد اپنی پرائیویسی سیٹنگز کو بہتر بنائیں، اجنبی افراد کی فرینڈ ریکوئسٹ قبول نہ کریں، مشکوک لنکس نہ کھولیں اور ممکن ہو تو ورچوئل پرائیویٹ نیٹ ورک (VPN) کا استعمال کریں تاکہ ڈیٹا محفوظ رہے۔

اگر آپ کا اکاؤنٹ ہیک ہو جائے تو دوستوں اور اہلِ خانہ کو فوری طور پر اطلاع دیں تاکہ وہ کسی دھوکے یا فراڈ کا شکار نہ ہوں۔ ہیکرز اکثر متاثرہ اکاؤنٹ سے ان کے قریبی افراد کو پیغامات بھیج کر مالی یا ذاتی معلومات حاصل کرنے کی کوشش کرتے ہیں۔

ماہرین کے مطابق زیادہ تر صورتوں میں ہیک شدہ فیس بک اکاؤنٹ بازیاب ہو جاتا ہے اور اس میں موجود تصاویر، پوسٹس اور کانٹیکٹس محفوظ رہتے ہیں۔ تاہم، وہ اکاؤنٹس جو طویل عرصے سے غیر فعال ہوں یا جن کی ملکیت ثابت نہ ہو سکے، انہیں مستقل طور پر بند کیا جا سکتا ہے۔