سوشل میڈیا سے پیسے کمانے والے ہوجائیں خبردار!!!

نیشنل سائبر کرائم انویسٹی گیشن ایجنسی کے اختیارات میں نمایاں اضافہ کر دیا گیا ہے، جس کے بعد سوشل میڈیا کے ذریعے غلط معلومات پھیلا کر پیسہ کمانے والے افراد بھی اب قانون کی گرفت میں آئیں گے۔

 وزارت داخلہ کے مطابق یہ اقدام سائبر جرائم کی روک تھام اور ان کے خلاف مؤثر کارروائی کو یقینی بنانے کے لیے کیا گیا ہے، اور اب سائبر جرائم کو اینٹی منی لانڈرنگ ایکٹ کے تحت قابلِ سزا جرائم قرار دے دیا گیا ہے۔

حکومتی فیصلے کے مطابق سوشل میڈیا پر جھوٹی یا گمراہ کن معلومات کے ذریعے حاصل کی گئی آمدن کی بھی تحقیقات منی لانڈرنگ قوانین کے تحت کی جائیں گی۔ اس کے ساتھ ساتھ ایجنسی کو سائبر دہشت گردی، الیکٹرانک فراڈ، غیر قانونی سم کارڈز کے اجرا اور شناختی معلومات کے غیر مجاز استعمال جیسے جرائم پر بھی کارروائی کا اختیار دے دیا گیا ہے۔

مزید برآں، بچوں کے جنسی استحصال، چائلڈ پورنوگرافی، آن لائن گرومنگ اور سائبر لالچ جیسے سنگین جرائم کی بھی اب یہ ایجنسی تحقیقات کرے گی۔ اگر انفارمیشن سسٹمز کا استعمال اغوا، اسمگلنگ یا بچوں کی ٹریفکنگ جیسے جرائم میں کیا گیا ہو، تو ان کے خلاف بھی سخت کارروائی عمل میں لائی جائے گی۔

حکام کا کہنا ہے کہ ان ترامیم کے ذریعے سائبر کرائمز کے خلاف قانونی دائرہ وسیع کیا گیا ہے تاکہ ڈیجیٹل دنیا میں بڑھتے ہوئے جرائم پر قابو پایا جا سکے اور شہریوں کو ایک محفوظ آن لائن ماحول فراہم کیا جا سکے۔