کیا پانچ سے زیادہ سمز استعمال کرنے پر فون بلاک ہوجائے گا؟ بڑی حقیقت سامنے آگئی

پی ٹی اے کی ڈائریکٹر کمیونیکیشنز زیب النساء کا کہنا ہے کہ پانچ سے زیادہ سمز استعمال کرنے پر فون کے بلاک ہونے سے متعلق کوئی ایڈوائزری جاری نہیں کی گئی۔

سوشل میڈیا پر گردش کرنے والی اس وائرل پوسٹ کی پاکستان ٹیلی کمیونیکیشن اتھارٹی (پی ٹی اے) نے سختی سے تردید کی ہے، جس میں دعویٰ کیا گیا تھا کہ اگر کوئی صارف ایک ہی موبائل فون میں ایک ماہ کے دوران پانچ سے زائد سمز استعمال کرے گا تو اس کا موبائل فون بلاک کر دیا جائے گا۔

یہ جھوٹا دعویٰ ایک جعلی پریس ریلیز کے ذریعے پھیلایا گیا، جس پر پی ٹی اے کا لوگو استعمال کرتے ہوئے صارفین کو مبینہ وارننگ دی گئی کہ مقررہ حد سے زیادہ سمز کے استعمال کی صورت میں ان کی نیٹ ورک سروسز معطل کر دی جائیں گی۔ تاہم، پی ٹی اے کی ڈائریکٹر کمیونیکیشنز زیب النساء نے واضح کیا ہے کہ اتھارٹی کی جانب سے ایسی کوئی ہدایت یا ایڈوائزری جاری نہیں کی گئی۔

انہوں نے کہا کہ پی ٹی اے صرف آئی ایم ای آئی کی ڈپلیکیشن اور کلوننگ پر نظر رکھتا ہے اور اسی دائرے میں کارروائیاں کرتا ہے، جیسے کہ مشکوک ڈیوائسز کو بلاک کرنا، ایف آئی اے کے ساتھ مشترکہ چھاپے مارنا اور عوام میں شعور بیدار کرنے کے لیے آگاہی مہمات چلانا۔

پی ٹی اے کے مؤقف کی تائید ایک نجی ٹیلی کام کمپنی "جاز” کے ترجمان نے بھی کی ہے، جنہوں نے نام ظاہر نہ کرنے کی شرط پر بتایا کہ پاکستان میں ایسا کوئی تکنیکی نظام موجود نہیں جو کسی موبائل فون میں سمز کی ماہانہ تعداد کو محدود کر سکے یا اس بنیاد پر فون بلاک کرے۔

پی ٹی اے کے سرکاری سوشل میڈیا اکاؤنٹس پر بھی اس افواہ کو جعلی قرار دیتے ہوئے عوام کو خبردار کیا گیا ہے کہ وہ ایسی غیر مصدقہ اور گمراہ کن اطلاعات پر یقین نہ کریں۔

واضح رہے کہ ’’ایک ماہ میں پانچ سے زائد سمز استعمال کرنے پر فون بلاک ہونے‘‘ کا دعویٰ نہ صرف غلط بلکہ مکمل طور پر بے بنیاد ہے۔