اسمارٹ ٹی وی کس طرح آپ کی جاسوسی کر رہا ہے؟ ماہرین نے بتادیا

اسمارٹ ٹی وی بظاہر صرف تفریح کا ذریعہ نظر آتا ہے، دراصل صارفین کی نجی زندگی پر نظر رکھنے کی صلاحیت رکھتا ہے۔

ڈیجیٹل دور کی سہولتوں کے ساتھ جہاں موبائل فون، انٹرنیٹ، اسمارٹ ڈیوائسز اور سوشل میڈیا نے زندگی آسان بنا دی ہے، وہیں پرائیویسی کے خطرات بھی تیزی سے بڑھ رہے ہیں۔ خاص طور پر اسمارٹ ٹی وی، جو بظاہر صرف تفریح کا ذریعہ نظر آتا ہے، دراصل صارفین کی نجی زندگی پر گہری نظر رکھنے کی صلاحیت بھی رکھتا ہے۔

جدید اسمارٹ ٹی وی برانڈز میں شامل فیچرز جیسے کہ وائس کمانڈز، مائیکروفون، کیمرہ، انٹرنیٹ ایکسیس اور مختلف ٹریکرز نہ صرف صارف کے تجربے کو بہتر بناتے ہیں بلکہ ان کے ذریعے صارف کی آن لائن اور آف لائن سرگرمیوں کا مکمل ڈیٹا اکٹھا کیا جاتا ہے۔ یہ ڈیٹا جس میں براؤزنگ ہسٹری، ای میل ایڈریس، مقام، ادائیگی کی تفصیلات اور ناظرین کے پسندیدہ پروگرام شامل ہو سکتے ہیں۔ کمپنیوں اور اشتہاری اداروں تک پہنچایا جاتا ہے۔

اسمارٹ ٹی وی پر انٹرنیٹ براؤزر کا استعمال ایک اور تشویشناک پہلو ہے۔ ان براؤزرز میں نہ تو اینٹی وائرس ہوتا ہے، نہ وی پی این اور نہ ہی دیگر حفاظتی اقدامات جو موبائل یا کمپیوٹر میں موجود ہوتے ہیں۔ نتیجتاً، یہ براؤزر سائبر حملہ آوروں کے لیے ایک آسان ہدف بن سکتے ہیں۔

ماہرین مشورہ دیتے ہیں کہ اگر براؤزر کا استعمال ضروری ہو تو وی پی این ضرور انسٹال کریں تاکہ انٹرنیٹ ٹریفک انکرپٹ ہو جائے۔

اسمارٹ ٹی وی میں ’آٹومیٹک کانٹینٹ ریکگنیشن‘ (ACR) نامی ٹیکنالوجی بھی عام ہے، جو اسکرین پر چلنے والے مواد کا تجزیہ کرتی ہے اور اس ڈیٹا کو کمپنیوں تک پہنچاتی ہے تاکہ صارف کی پسند کے مطابق اشتہارات دکھائے جا سکیں۔ اگرچہ کچھ صارفین اسے نقصان دہ نہیں سمجھتے، مگر ماہرین اسے پرائیویسی کی سنگین خلاف ورزی قرار دیتے ہیں۔ خوش قسمتی سے، مختلف برانڈز کے اسمارٹ ٹی وی میں اس فیچر کو بند کرنے کی سہولت موجود ہے۔

ایک اور حساس مسئلہ کیمرہ اور مائیکروفون کا ہے۔ بعض اسمارٹ ٹی وی میں یہ فیچرز ٹی وی آف ہونے کے بعد بھی فعال رہتے ہیں، جس سے صارفین کی نجی بات چیت سنی جا سکتی ہے یا کیمرہ کے ذریعے ان کی جاسوسی ممکن ہے۔

ماہرین کا کہنا ہے کہ اسمارٹ ٹی وی خریدنے سے پہلے اس کے فیچرز اور پرائیویسی سیٹنگز کا تفصیلی جائزہ لینا ضروری ہے۔ کیمرہ بند کرنے کے لیے کالی ٹیپ کا استعمال، مائیکروفون اور ٹریکرز کو آف کرنا، پاس ورڈز کی تبدیلی اور سیکیورٹی اپڈیٹس پر نظر رکھنا ایسے اقدامات ہیں جو صارف کی پرائیویسی کو بہتر طور پر محفوظ رکھ سکتے ہیں۔