آئی فون 16 استعمال کرنے والوں کیلئے خطرے کی گھنٹی بج گئی

پاکستان میں ایپل کی نئی آئی فون 16 سیریز خریدنے والے صارفین شدید مایوسی اور غصے کا شکار ہیں کیونکہ فونز میں ایسی خرابی سامنے آ رہی ہے جو روزمرہ استعمال کو مشکل بنا رہی ہے۔

صارفین کا کہنا ہے کہ آئی فون 16 پرو میکس سمیت دیگر ماڈلز کال یا میسج دیکھنے کے دوران اچانک فریز ہو جاتے ہیں، جس کی وجہ سے فون کال کے دوران یا میسج کھولتے ہوئے ڈیوائس مکمل طور پر بند ہو جاتی ہے اور استعمال کے قابل نہیں رہتی۔

اسلام آباد کے ایک صارف نے اس مسئلے پر شدید تحفظات کا اظہار کیا اور اسے دھوکہ دہی قرار دیا۔ کراچی، لاہور اور اسلام آباد میں کیے گئے سروے کے مطابق خاص طور پر کراچی کے صدر علاقے میں واقع اسٹار سٹی مال کے ایپل شاپ پر اس مسئلے کی شکایات زیادہ موصول ہوئی ہیں۔ دکاندار اس خرابی کی ذمہ داری قبول کرنے سے انکار کرتے ہوئے کہتے ہیں کہ وہ صرف پیک سیٹ امپورٹ کرتے ہیں۔

پاکستان میں ایپل کے آفیشل ڈسٹری بیوٹر مرکنٹائل نے بھی صارفین کو مایوس کیا ہے اور صرف فیکٹری ریسٹ کرنے کا مشورہ دیتا ہے جبکہ صارفین کو ایپل ہیلپ لائن سے رجوع کرنے کو کہا جاتا ہے، جو پاکستان میں باضابطہ طور پر موجود نہیں ہے۔

 کمپنی نے مقامی نیٹ ورکس خصوصاً ٹیلی نار کو بھی اس مسئلے کا ذمہ دار قرار دینے کی کوشش کی، تاہم صارفین کا کہنا ہے کہ یہی سم کارڈ پرانے آئی فون ماڈلز میں بغیر کسی مسئلے کے کام کرتے ہیں۔

یہ مسئلہ پاکستان تک محدود نہیں بلکہ بیرون ملک بھی صارفین نے اسی خرابی کی شکایت کی ہے۔ ریڈٹ پر صارفین نے بتایا کہ غیر ایپل فونز سے کالز پر ڈیوائس صحیح کام کرتی ہے، لیکن جب کسی دوسرے آئی فون سے کال آتی ہے تو فون فریز ہو جاتا ہے۔ ایپل سپورٹ نے بھی اب تک کوئی مؤثر حل فراہم نہیں کیا۔

کچھ مایوس صارفین نے پولیس اور ایف آئی اے سے رجوع کیا مگر انہیں پی ٹی اے کے حوالے کیا گیا، تاہم پی ٹی اے اس مسئلے پر خاموش ہے حالانکہ وہ ہر درآمد شدہ آئی فون پر بھاری ٹیکس وصول کرتا ہے۔ صارفین کا مطالبہ ہے کہ ٹیلی کام ریگولیٹر کے طور پر پی ٹی اے خریداروں کے حقوق کا تحفظ کرے۔ اب تک ایپل کی جانب سے اس مسئلے پر کوئی باضابطہ جواب سامنے نہیں آیا۔