جوا ایپلی کیشن کی فروغ؛ ڈکی بھائی کے بعد ایک اور بڑی گرفتاری ہوگئی

لاہور میں نیشنل سائبر کرائم انویسٹی گیشن ایجنسی نے غیر قانونی جوا ایپلی کیشن کو فروغ دینے پر سوشل میڈیا ایکٹوسٹ کو گرفتار کر لیا۔

نیشنل سائبر کرائم انویسٹی گیشن ایجنسی نے ملزم مدثر حسن کیخلاف مقدمہ درج کر لیا ہے اور اس کے قبضے سے موبائل فون اور لیپ ٹاپ برآمد کر لیا ہے۔

این سی سی آئی اے کا کہنا ہے کہ ملزم سوشل میڈیا پلیٹ فارم پر جوابازی ایپس کی پروموشن کرتا تھا۔ ایجنسی نے عدالت سے ملزم مدثر حسن کا 5 روزہ جسمانی ریمانڈ حاصل کر لیا ہے۔

نیشنل سائبر کرائم انویسٹی گیشن ایجنسی (NCCIA) نے آن لائن جوا اور غیر قانونی ٹریڈنگ ایپس کو فروغ دینے کے الزام میں چار معروف یوٹیوبرز کو طلب کر لیا۔

ترجمان نے بتایا کہ اقرا کنول، مدثر حسن، حسنین شاہ اور انس علی کو 2 ستمبر کو ذاتی حیثیت میں پیش ہونے کی ہدایت کی گئی ہے۔

حکام کا کہنا ہے کہ مذکورہ یوٹیوبرز سوشل میڈیا پلیٹ فارمز کے ذریعے عوام کو غیر قانونی ایپس استعمال کرنے پر اکساتے اور گمراہ کن مواد کے ذریعے آن لائن ٹریڈنگ و جوا کھیلنے کی حوصلہ افزائی کرتے ہیں۔

این سی سی آئی اے کے مطابق اس معاملے کی مزید تحقیقات جاری ہیں اور اگر الزامات ثابت ہوئے تو سخت قانونی کارروائی عمل میں لائی جائے گی۔

یاد رہے کہ پاکستان کے معروف یوٹیوبر سعد الرحمان المعروف ڈکی بھائی کو امیگریشن حکام نے ہفتہ اور اتوار کی درمیانی شب اس وقت لاہور ایئرپورٹ سے گرفتار کیا، جب وہ اپنا نام پی این آئی ایل فہرست میں شامل ہونے کے باوجود بیرون ملک جا رہے تھے تاہم حکام نے گرفتاری کے بعد نیشنل سائبر کرائم انویسٹی گیشن ایجنسی (این سی سی آئی اے) کے حوالے کر دیا تھا۔