پاکستان میں فائیو جی کب آ رہا ہے؟ بڑی خبر آگئی

وزیراعظم شہباز شریف نے بالآخر فائیو جی اسپیکٹرم کی نیلامی کی منظوری دے دی ہے جس کا عمل دسمبر 2025 تک مکمل کرنے کا ہدف مقرر کیا گیا ہے۔

اس بات کا انکشاف سینیٹ کی قائمہ کمیٹی برائے آئی ٹی کو وزارتِ اطلاعات و ٹیکنالوجی کی بریفنگ کے دوران ہوا جس کی صدارت سینیٹر پلوشہ محمد زئی خان نے کی۔

اجلاس میں بتایا گیا کہ اسپیکٹرم نیلامی سے متعلق مشاورتی کمیٹی کی سربراہی وزیرِ خزانہ محمد اورنگزیب کر رہے ہیں جو جلد ہی بین الاقوامی کنسلٹنٹ کی تجاویز کا جائزہ لے گی۔

پاکستان ٹیلی کمیونیکیشن اتھارٹی (پی ٹی اے) اور فریکوئنسی الاوکیشن بورڈ (ایف اے بی) کے مطابق ملک میں 606 میگاہرٹز اسپیکٹرم دستیاب ہے تاہم اس میں سے 154 میگاہرٹز عدالتی کارروائیوں کے باعث فوری استعمال کے لیے دستیاب نہیں۔

پی ٹی اے کے ڈائریکٹر جنرل لائسنسنگ عامر شہزاد نے کمیٹی کو آگاہ کیا کہ 2600 MHz اور 3500 MHz کی فریکوئنسیز فائیو جی اور فور جی نیٹ ورکس کے معیار اور دائرہ کار کے لیے نہایت اہم ہیں۔ انہوں نے یہ بھی نشاندہی کی کہ پاکستان کا موجودہ اسپیکٹرم خطے کے دیگر ممالک کے مقابلے میں خاصا کم ہے۔

سابق وفاقی وزیر انوشہ رحمان نے نیلامی کے عمل میں شفافیت کو یقینی بنانے کے لیے قومی احتساب بیورو (نیب) کو بھی شامل کرنے کی تجویز پیش کی۔ ساتھ ہی زیرِ التوا عدالتی کیسز پر قانونی ماہرین نے کمیٹی کو بریفنگ دی، جن کی اگلی سماعت 17 ستمبر کو متوقع ہے۔ کمیٹی نے خبردار کیا کہ مزید تاخیر ملک کی ڈیجیٹل اور اقتصادی ترقی میں بڑی رکاوٹ بن سکتی ہے۔