آپ انسٹاگرام سے ڈالر کیسے کما سکتے ہیں؟ طریقہ جانیے

میٹا کا مقبول ترین سوشل میڈیا پلیٹ فارم انسٹاگرام روزانہ کروڑوں صارفین کی توجہ کا مرکز بنتا ہے، مگر یہ صرف تصاویر شیئر کرنے کا ذریعہ نہیں رہا، بلکہ اب یہ آن لائن آمدنی کا مؤثر پلیٹ فارم بھی بن چکا ہے۔

 دنیا بھر میں متعدد افراد انسٹاگرام کے ذریعے نہ صرف اپنی تخلیقی صلاحیتوں کا اظہار کرتے ہیں بلکہ اضافی آمدنی بھی حاصل کرتے ہیں۔ اکثر افراد کا پہلا سوال یہی ہوتا ہے کہ انسٹاگرام سے کمانے کے لیے کتنے فالوورز ہونے چاہئیں؟ ماہرین کے مطابق اس کا جواب سادہ نہیں، تاہم یہ ضرور کہا جا سکتا ہے کہ صرف فالوورز کی بڑی تعداد ہی ضروری نہیں۔ بعض صورتوں میں چند سو یا ہزار فالوورز کے ساتھ بھی آمدنی کا آغاز ممکن ہوتا ہے، بشرطیکہ صارف کی فالوورز کے ساتھ انگیجمنٹ مضبوط ہو۔ کمپنیاں آج کل فالوورز کی تعداد کے بجائے صارف کی پوسٹس پر لائکس، کمنٹس اور ویوز جیسے عوامل کو ترجیح دیتی ہیں۔

انسٹاگرام سے آمدنی کے کئی طریقے موجود ہیں، جن میں سب سے زیادہ مقبول طریقہ اسپانسرڈ پوسٹس کا ہے۔ اگر کوئی صارف ایک اچھا انفلوئنسر ہے اور جانتا ہے کہ فالوورز کو کیسے متحرک رکھنا ہے، تو وہ برانڈز کے اشتہارات کے ذریعے اچھی خاصی آمدنی حاصل کر سکتا ہے۔

اسی طرح افیلیئیٹ مارکیٹنگ بھی ایک مؤثر طریقہ ہے، جہاں صارفین مخصوص برانڈز کے لنکس اپنی پوسٹس میں شامل کرتے ہیں اور ان پر ہونے والی خریداری سے کمیشن حاصل کرتے ہیں۔ اس کے لیے زیادہ فالوورز کی ضرورت نہیں ہوتی بلکہ بہتر مارکیٹنگ حکمت عملی اہم کردار ادا کرتی ہے۔

علاوہ ازیں، انسٹاگرام پر اپنا آن لائن اسٹور کھول کر ذاتی مصنوعات فروخت کرنا، یا فوٹوگرافی کے ذریعے تصاویر بیچنا بھی پیسے کمانے کا کارآمد ذریعہ بن چکا ہے۔ بہت سے برانڈز انسٹاگرام پر معیاری تصاویر یا آرٹ ورک کے لیے ادائیگی کرتے ہیں، جبکہ بعض صارفین اپنے فالوورز کو فوٹو پرنٹس بھی فروخت کرتے ہیں۔

انسٹاگرام کی جانب سے متعارف کردہ بیج پروگرام اور سبسکرپشنز پروگرام بھی آمدنی کا ذریعہ ہیں، تاہم ان میں شمولیت کے لیے کم از کم 10 ہزار فالوورز ضروری ہیں۔ بیج پروگرام میں فالوورز لائیو سیشنز کے دوران اپنے پسندیدہ کریئیٹرز کو سپورٹ کرنے کے لیے بیجز خریدتے ہیں، جبکہ سبسکرپشنز پروگرام کے تحت صارفین ماہانہ فیس کے بدلے خصوصی مواد تک رسائی حاصل کرتے ہیں۔

ماہرین کا کہنا ہے کہ انسٹاگرام پر کمائی کے لیے صرف فالوورز کی گنتی نہیں بلکہ معیاری مواد، مستقل مزاجی اور فالوورز کے ساتھ مضبوط تعلق کامیابی کی کنجی ہے۔