پاکستان میں آئی فون 17 کے تمام ماڈلز کب دستیاب ہوں گے اور پی ٹی اے ٹیکس کتنا ہوگا؟

کمپنی کے مطابق بیس ماڈل آئی فون 17 کی قیمت 799 ڈالر رکھی گئی ہے۔ آئی فون 17 پرو کی قیمت 1099 ڈالر، پرو میکس کی 1199 ڈالر اور آئی فون ایئر کی قیمت 999 ڈالر مقرر کی گئی ہے۔

دنیا بھر میں ان ماڈلز کے پری آرڈرز 12 ستمبر سے شروع ہوں گے۔ جبکہ باقاعدہ دستیابی 19 ستمبر سے ممکن ہوگی۔ پاکستان میں عموماً نئے آئی فونز اکتوبر کے پہلے ہفتے میں پہنچتے ہیں۔ یہ فونز مرسینٹائل اور جی نیکسٹ جیسے ڈسٹریبیوٹرز کے ذریعے آتے ہیں اور پی ٹی اے سے تصدیق شدہ ہوتے ہیں۔

غیر پی ٹی اے آئی فونز اکثر ڈیلرز جلدی لے آتے ہیں، لیکن ان کی قیمتیں بہت زیادہ ہوتی ہیں۔ بعد میں جب صارفین ان کو پی ٹی اے سے اپروو کراتے ہیں تو بھاری ٹیکس بھی دینا پڑتا ہے۔ دوسری طرف سرٹیفائیڈ کمپنیاں بڑے پیمانے پر پی ٹی اے سے اپروول لیتی ہیں جس سے انہیں کچھ ریلیف ملتا ہے۔

پاکستانی ویب سائٹ "فون ورلڈ” کے مطابق نئے آئی فون 17 ماڈلز کے مبینہ پی ٹی اے ٹیکس بھی سامنے آئے ہیں۔ اگرچہ یہ ٹیکس وقت کے ساتھ تبدیل ہوسکتے ہیں، مگر فی الحال صارفین کو اسی اندازے سے رہنمائی مل رہی ہے۔ اصل رقم صرف پی ٹی اے کی ویب سائٹ پر ہی درست طور پر دیکھی جا سکتی ہے۔

قیمت کے لحاظ سے دیکھا جائے تو شروع کے دنوں میں آئی فون 17 پرو میکس کی قیمت مارکیٹ میں پانچ لاکھ روپے سے اوپر جا سکتی ہے۔ تاہم ماہرین کا خیال ہے کہ کچھ ہفتوں بعد اس کی قیمت چار لاکھ 50 ہزار سے پانچ لاکھ روپے کے درمیان ہوگی۔