آئی فون 17 ڈیزائن کرنے والا نوجوان عابدور چوہدری کون ہے؟

امریکی ٹیکنالوجی کمپنی ایپل نے حال ہی میں اپنی نئی آئی فون 17 سیریز متعارف کروائی ہے، جس میں ایک نیا اور منفرد ماڈل "آئی فون ایئر” خاص توجہ کا مرکز بنا ہوا ہے۔

 کمپنی کے مطابق "آئی فون ایئر” اب تک کا سب سے ہلکا اور پتلا آئی فون ہے، جو نہ صرف ڈیزائن بلکہ کارکردگی کے لحاظ سے بھی ایک نمایاں پیش رفت ہے۔

یہ ماڈل ٹائیٹینیم میٹریل سے تیار کیا گیا ہے اور 256 جی بی والے ورژن کی قیمت 999 امریکی ڈالرز رکھی گئی ہے۔ فون میں سنگل ٹیلی فوٹو کیمرہ نصب ہے، جسے مصنوعی ذہانت کی مدد سے بہتر بنایا گیا ہے تاکہ فوٹوگرافی کا معیار مزید بلند ہو۔

 بیٹری کے حوالے سے کمپنی کا کہنا ہے کہ اگرچہ اس فون میں نسبتا چھوٹی بیٹری استعمال کی گئی ہے، لیکن اس میں موجود بیٹری سیونگ سافٹ ویئر ڈیوائس کو ایک دن تک فعال رکھتا ہے۔

اس جدید فون کو ڈیزائن کرنے میں کلیدی کردار بنگلا دیشی نژاد صنعتی ڈیزائنر عابدور چوہدری نے ادا کیا، جنہوں نے کیلیفورنیا میں منعقدہ لانچ ایونٹ میں "آئی فون ایئر” کو دنیا کے سامنے پیش کیا۔ اس موقع پر عابدور چوہدری نے کہا کہ "یہ ایک ایسا تضاد ہے جسے محسوس کیے بغیر یقین کرنا مشکل ہے۔”

عابدور چوہدری لندن میں پیدا ہوئے اور وہیں سے ابتدائی تعلیم حاصل کی۔ انہوں نے برطانیہ کی لوغ بورو یونیورسٹی سے پروڈکشن ڈیزائن اور ٹیکنالوجی میں ڈگری حاصل کی۔ تعلیم کے دوران وہ کئی نمایاں اعزازات اپنے نام کر چکے ہیں، جن میں ’ڈی ہبز سٹوڈنٹ گرانٹ‘، ’جیمز ڈائسن فاؤنڈیشن برسری‘، ’نیو ڈیزائنرز کین ووڈ ایوارڈ‘ اور ’سیمور پاول ڈیزائن ویک مقابلے‘ میں پہلی پوزیشن شامل ہے۔ سال 2016 میں انہیں "پلگ اینڈ پلے” ڈیزائن پر ریڈ ڈاٹ ڈیزائن ایوارڈ سے بھی نوازا گیا۔

پیشہ ورانہ زندگی میں عابدور چوہدری نے برطانیہ کی معروف کمپنیوں جیسے کیمبرج کنسلٹنٹس اور کروینٹا کے ساتھ بطور انٹرن کام کیا، جبکہ لندن میں لیئر ڈیزائن سے بھی وابستہ رہے۔ 2018 سے 2019 تک انہوں نے اپنی ذاتی کنسلٹنسی فرم چلائی، جہاں مختلف اداروں اور اسٹارٹ اپس کے لیے ڈیزائن اور مصنوعات کی حکمت عملی تیار کیں۔ جنوری 2019 میں وہ ایپل سے بطور صنعتی ڈیزائنر وابستہ ہوئے اور تب سے کمپنی کی متعدد اہم مصنوعات کے ڈیزائن میں نمایاں کردار ادا کر چکے ہیں، جن میں تازہ ترین "آئی فون ایئر” بھی شامل ہے۔

عابدور چوہدری اپنی تخلیقی سوچ اور مسئلہ حل کرنے کی صلاحیت کے باعث ٹیکنالوجی اور ڈیزائن کی دنیا میں ایک ابھرتا ہوا نام بن چکے ہیں۔ ان کا ماننا ہے کہ وہ ایسی مصنوعات بنانا چاہتے ہیں جن کے بغیر لوگوں کا گزارا ممکن نہ ہو۔