غیر رجسٹرڈ موبائل فونز استعمال کرنے والوں کیلئے خطرے کی گھنٹی؛ پی ٹی اے کا اہم اعلان

پاکستان ٹیلی کمیونیکیشن اتھارٹی (پی ٹی اے) نے ملک بھر کے شہریوں کو خبردار کیا ہے کہ تمام غیر رجسٹرڈ موبائل فونز کو جلد مقامی نیٹ ورکس سے بلاک کر دیا جائے گا۔

 اتھارٹی کی جانب سے جاری اعلامیے میں کہا گیا ہے کہ صارفین اپنے فونز کو فوری طور پر ڈیوائس آئیڈینٹیفیکیشن رجسٹریشن اینڈ بلاکنگ سسٹم (DIRBS) کے ذریعے رجسٹر کروائیں تاکہ بلا تعطل موبائل سروسز سے استفادہ حاصل کر سکیں۔

پی ٹی اے کے مطابق غیر رجسٹرڈ موبائل فونز نہ صرف قومی سلامتی کے لیے خطرہ بن سکتے ہیں بلکہ ان کے ذریعے مالیاتی اور سائبر جرائم میں اضافے کا خدشہ بھی بڑھ جاتا ہے۔

 اتھارٹی نے واضح کیا ہے کہ ایسے فونز کی خرید و فروخت یا استعمال پاکستان کے موجودہ قوانین کے تحت قابلِ سزا جرم ہے، اور ان افراد کے خلاف قانونی کارروائی کی جا سکتی ہے جو ان فونز کو استعمال میں لاتے ہیں۔

پی ٹی اے نے عوام سے اپیل کی ہے کہ وہ غیر رجسٹرڈ موبائل فونز کی خرید و فروخت سے مکمل گریز کریں، کیونکہ یہ فونز سرکاری نظام میں شامل نہیں ہوتے اور ان کا قانونی طور پر استعمال ممکن نہیں ہوتا۔ اتھارٹی کے مطابق ایسے فونز کے مسلسل استعمال سے صارفین کو نہ صرف سروس کی معطلی کا سامنا کرنا پڑ سکتا ہے بلکہ قانونی پیچیدگیوں میں بھی الجھا جا سکتا ہے۔

اتھارٹی نے مزید کہا ہے کہ صارفین کے پاس رجسٹریشن کے لیے محدود وقت ہے، اور کسی بھی قسم کی رکاوٹ سے بچنے کے لیے ضروری ہے کہ وہ فوری طور پر اپنے موبائل فون کا اسٹیٹس DIRBS پورٹل پر چیک کریں اور رجسٹریشن کا عمل مکمل کریں۔ پی ٹی اے کا یہ اقدام صارفین کے ڈیجیٹل تحفظ اور ملک میں قانون نافذ کرنے والے اداروں کی مؤثر نگرانی کے لیے اٹھایا گیا ہے۔