اسحاق ڈارکی امریکی وزیرخارجہ سے ملاقات، تجارت اور سرمایہ کاری سمیت اہم شعبوں میں تعاون پرتبادلہ خیال

نائب وزیراعظم اسحاق ڈار کی امریکی وزیر خارجہ مارکو روبیو سے اہم ملاقات ہوئی ہے۔

امریکی محکمہ خارجہ پہنچنے پر حکام نے نائب وزیراعظم اسحاق ڈار کا استقبال کیا اس موقع پر پاکستان کے سفیر رضوان سعید بھی موجود تھے۔

وفود کی سطح پر ہونے والی ملاقات میں دونوں فریقین کی جانب سے سینئر حکام نے شرکت کی اور اس دوران پاک امریکا تعلقات اور مختلف شعبہ جات میں تعاون پر بات چیت ہوئی۔

دو طرفہ تجارتی و اقتصادی روابط کے فروغ، سرمایہ کاری ودیگر شعبہ جات میں تعاون پر گفتگو کی گئی، انسداد دہشت گردی اور علاقائی امن سے متعلق بھی تبادلہ خیال کیا گیا۔

اسحاق ڈار نے عالمی امن کے فروغ میں صدر ٹرمپ اور امریکی قیادت کی کوششوں پر خراج تحسین پیش کیا۔

انہوں نے کہا کہ پاک بھارت کشیدگی میں صدر ٹرمپ کا کردار اور کاوشیں لائق تحسین ہیں، پاک امریکا تعلقات میں مزید وسعت اور استحکام کے خواہاں ہیں، دونوں ملکوں کے درمیان جاری ٹریڈ ڈائیلاگ میں مثبت پیش کے لیے پرامید ہیں۔

نائب وزیراعظم نے کہا کہ پاکستان امریکی کاروباری برادری اور سرمایہ کاروں کے لیے پرکشش منزل ہے، علاقائی امن کے لیے دونوں ممالک کے نقطہ نظر اور مفادات میں ہم آہنگی ہے، امریکا میں پاکستانی کمیونٹی دونوں ممالک کے درمیان پل کا کردار ادا کررہی ہے۔

دوسری جانب امریکی وزیر نے دہشت گردی کے خلاف جنگ میں پاکستان کی قربانیوں کا اعتراف کرتے ہوئے کہا کہ عالمی و علاقائی امن کے لیے پاکستان نے ہمیشہ مثبت کردار ادا کیا ہے۔

اسحاق ڈار اور مارکو روبیو نے دو طرفہ تعلقات کے فروغ اور مضبوط روابط استوار کرنے کے لیے مل کر کام کرنے کے عزم کا اعادہ کیا۔