اے ٹی سی سے سزائیں؛ سینیٹر اعجاز چودھری، احمد بھچر اور احمد چٹھہ نااہل قرار

اسلام آباد: الیکشن کمیشن آف پاکستان نے  پاکستان تحریک انصاف (پی ٹی آئی) کے سینیٹر اعجاز چودھری، ایم این اے محمد احمد چٹھہ اور  اپوزیشن لیڈر  پنجاب اسمبلی احمد خان بھچرکی نااہلی کا نوٹیفکیشن جاری کردیا۔

الیکشن کمیشن نے  سینیٹر اعجاز چودھری کی نااہلی کا نوٹیفکیشن جاری کرتے ہوئےکہا ہے کہ انھیں انسداد دہشت گردی عدالت نے مجرم قرار دے کر 10 سال کی سزا سنائی ہے۔

الیکشن کمیشن کے مطابق اعجاز چودھری آرٹیکل 63 ون ایچ کے تحت رکن سینیٹر رہنےکے اہل نہیں رہے۔

الیکشن کمیشن کی جانب سے ایم این اے محمد احمد چٹھہ اور اپوزیشن لیڈر پنجاب اسمبلی احمد خان کی نااہلی کا نوٹیفکیشن بھی جاری کیا گیا ہے۔

نوٹیفکیشن کے مطابق انسداد دہشت گردی عدالت نے احمد چٹھہ اور احمد خان بھچرکو مجرم قرار دیتے ہوئے 10 سال کی سزا سنائی ہے۔

الیکشن کمیشن کے مطابق احمد چٹھہ این اے 66 وزیرآباد اور احمد خان بھچر پی پی87 میانوالی سے منتخب ارکان اسمبلی تھے۔