سینئر ایڈووکیٹ نامعلوم افراد کی فائرنگ سے جاں بحق

سینئر ایڈووکیٹ شمس الاسلام نامعلوم افراد کی فائرنگ سے جاں بحق ہو گئے۔

پولیس کے مطابق خواجہ شمس الاسلام خیابان راحت میں نماز پڑھ کر مسجد سے نکلے تھے کہ گھات لگائے نامعلوم ملزمان نے ان پر فائرنگ کردی۔

فائرنگ کے نتیجے میں خواجہ شمس الاسلام اور ان کے بیٹے سمیت 3 افراد زخمی ہوگئے، جنہیں نجی اسپتال منتقل کیا گیا، جہاں خواجہ شمس الاسلام زخموں کی تاب نہ لاتے ہوئے دم توڑ گئے، انہیں 3 گولیاں لگی تھیں۔

واقعے کی سی سی ٹی وی جی ٹی وی نیوز نے حاصل کرلی ہے، جس میں ملزم کو فائرنگ کے بعد فرار ہوتے دیکھا جاسکتا ہے۔

پولیس کے مطابق فائرنگ کے بعد فرار ہونے والے ملزم نے نیلے رنگ کی شلوار قمیض پہن رکھی تھی، ملزم کی شناخت عمران آفریدی کے نام سے ہوگئی ہے۔

پولیس کے مطابق شمس الاسلام پر گزشتہ سال بھی حملہ ہوا تھا، جس میں ان کے کاندھے پر گولی لگی تھی۔