سیکیورٹی فیچرڈ نمبر پلیٹ لگوانے والوں کیلئے اہم خبر آگئی

سیکیورٹی فیچرڈ نمبر پلیٹ لگوانے کی ڈیڈلائن بڑھا دی گئی ہے۔

سندھ حکومت نے کراچی کے شہریوں کو بڑی سہولت فراہم کرتے ہوئے سیکیورٹی فیچرڈ نمبر پلیٹس لگوانے کی ڈیڈلائن میں توسیع کر دی ہے۔ اس حوالے سے حکومتِ سندھ کی جانب سے باقاعدہ نوٹیفکیشن جاری کر دیا گیا ہے، جس کے مطابق نئی آخری تاریخ 14 اگست سے بڑھا کر 31 اکتوبر 2025ء مقرر کر دی گئی ہے۔

 اس فیصلے کا اعلان وزیر ایکسائز اینڈ ٹیکسیشن سندھ مکیش کمار چاؤلہ نے چیئرمین پاکستان پیپلز پارٹی بلاول بھٹو زرداری سے ملاقات کے بعد کیا۔

ذرائع کے مطابق بلاول بھٹو زرداری نے عوامی سہولت کے پیش نظر ڈیڈلائن میں توسیع کی ہدایت کی تھی۔ مکیش چاؤلہ کا کہنا ہے کہ سیکیورٹی فیچرڈ نمبر پلیٹس کا استعمال صوبے میں سیکیورٹی کی بہتری کے لیے اہم ہے، کیونکہ یہ پلیٹس سیف سٹی پروجیکٹ سے منسلک ہیں، جو جرائم کی روک تھام اور نگرانی کے نظام کو مؤثر بنانے میں مدد فراہم کرے گا۔

یاد رہے کہ سندھ حکومت پہلے ہی شہریوں کے لیے نئی سیکیورٹی فیچرڈ نمبر پلیٹس کا استعمال لازمی قرار دے چکی ہے۔