شہریوں کو موبائل میسیجز فراڈ سے بچانے کیلئے اہم قدم

جوڈیشل ایکٹوازم پینل نے موبائل میسیجز کے ذریعے شہریوں سے فراڈ روکنے کیلئے پی ٹی اے اور دیگر اداروں کو مراسلہ جاری کردیا ہے۔

جوڈیشل ایکٹوازم پینل نے پاکستان میں موبائل میسیجز کے ذریعے شہریوں سے ہونے والے بڑھتے ہوئے فراڈ پر تشویش کا اظہار کرتے ہوئے پاکستان ٹیلی کمیونیکیشن اتھارٹی (پی ٹی اے)، ایف آئی اے، سیکریٹری انفارمیشن اور دیگر متعلقہ اداروں کو باضابطہ مراسلہ جاری کیا ہے۔

پینل کے نمائندے اظہر صدیق ایڈووکیٹ کی جانب سے جاری کردہ اس مراسلے میں کہا گیا ہے کہ جعلساز مختلف موبائل میسیجز کے ذریعے معصوم شہریوں کو جھوٹے دعووں اور لالچ میں مبتلا کرکے ان سے لاکھوں روپے ہتھیا رہے ہیں۔

مراسلے میں نشاندہی کی گئی ہے کہ یہ میسیجز اکثر بینک اکاؤنٹس میں رقم منتقل ہونے، یا جعلی انعامات جیتنے کے دعووں پر مبنی ہوتے ہیں، جن کے ذریعے شہریوں کو مالی نقصان پہنچایا جا رہا ہے۔

جوڈیشل ایکٹوازم پینل کا کہنا ہے کہ ایف آئی اے، ٹیلی کمیونیکیشن حکام اور سیکریٹری انفارمیشن اس بڑھتے ہوئے سائبر فراڈ کو روکنے میں مکمل طور پر ناکام دکھائی دے رہے ہیں۔

پینل نے اپنے مراسلے میں استفسار کیا ہے کہ اب تک جعلسازوں کے خلاف کیا عملی اقدامات کیے گئے ہیں، اور ان اقدامات کی تفصیلات فوری فراہم کی جائیں۔ بصورتِ دیگر جوڈیشل ایکٹوازم پینل نے خبردار کیا ہے کہ اگر تسلی بخش جواب نہ ملا تو لاہور ہائیکورٹ میں قانونی چارہ جوئی کی جائے گی۔