باجوڑ میں دہشتگردوں کے خلاف آپریشن کا فیصلہ

خیبر پختونخوا کے ضلع باجوڑ میں فتنہ الخوارج کے دہشتگردوں کے خلاف آپریشن کا فیصلہ کرلیا گیا۔

سرکاری ذرائع نے بتایا کہ ضلع باجوڑ میں شدت پسندوں سے مذاکراتی جرگہ ناکام ہونے پر باجوڑ اور خیبر میں دہشتگردوں کے خلاف آپریشن کا حتمی فیصلہ کرلیا گیا ہے۔

ذرائع کے مطابق قبائلی عمائدین کے جرگے نے فتنہ الخوارج کے سامنے علاقے سے انخلا سمیت تین مطالبات رکھے تھے، تاہم فتنہ الخوارج نے علاقے سے نکلنے سے صاف انکار کردیا۔

ذرائع نے کہا کہ باجوڑ کی تحصیل ماموند کے دو علاقوں میں لگ بھگ 300 دہشتگرد موجود ہیں، جبکہ خیبر اور باجوڑ میں سرگرم دہشتگردوں کی اکثریت، یعنی 80 فیصد سے زائد، افغان شہری ہیں۔

ذرائع کا مزید کہنا ہے کہ باجوڑ کی تحصیل ماموند کی مجموعی آبادی تین لاکھ سے زائد ہے، جن میں سے چالیس ہزار سے زیادہ لوگ اپنا علاقہ چھوڑ کر جاچکے ہیں۔