فیفا کی جانب سے ٹرمپ کو امن ایوارڈ دیدیا گیا

واشنگٹن: فٹبال کی عالمی تنظیم فیفا نے امریکی صدر ڈونلڈ ٹرمپ کو ’’فیفا پیس ایوارڈ‘‘ سے نواز دیا۔

یہ ایوارڈ آئندہ سال امریکا، کینیڈا اور میکسیکو میں شیڈول فٹبال ورلڈ کپ کے ڈراز کے موقع پر خصوصی تقریب میں پیش کیا گیا۔

تقریب واشنگٹن میں منعقد ہوئی، جہاں فیفا کے صدر جیانی انفینٹینو نے ڈونلڈ ٹرمپ کو امن کے لیے ’’غیر معمولی خدمات‘‘ کے اعتراف میں یہ اعزاز دیا۔

امریکی میڈیا کے مطابق فیفا نے پچھلے ماہ ہی اس ایوارڈ کا اعلان کیا تھا۔

ایوارڈ وصول کرنے کے بعد خطاب کرتے ہوئے ٹرمپ نے اسے اپنی زندگی کے اہم ترین اعزازات میں سے ایک قرار دیا۔

انہوں نے دعویٰ کیا کہ ان کی قیادت میں امریکا نے ’’لاکھوں جانیں بچائیں‘‘ اور کانگو، بھارت اور پاکستان جیسے خطوں میں تنازع بڑھنے سے پہلے ہی صورتحال کو قابو کیا۔

ٹرمپ نے جیانی انفینٹینو کی کارکردگی کو بھی سراہا اور کہا کہ ان کی سربراہی میں ٹکٹوں کی فروخت اور عالمی فٹبال کے اثرات میں ریکارڈ اضافہ ہوا ہے۔