پیٹرولیم مصنوعات کی قیمتوں سے متعلق تشویشناک خبر آگئی

آئی ایم ایف کو پیٹرولیم مصنوعات پر 5 روپے اضافی کاربن لیوی عائد کرنے کی یقین دہانی کروا دی گئی ہے۔

حکومت نے عالمی مالیاتی فنڈ (آئی ایم ایف) کو کلائمیٹ فنانسنگ کے تحت 13 نکاتی اصلاحاتی ایجنڈے پر عملدرآمد کی یقین دہانی کروا دی ہے۔ اس ایجنڈے میں پیٹرول اور ڈیزل پر 5 روپے اضافی کاربن لیوی بھی شامل ہے، جس کا مقصد ماحولیاتی اثرات کو کم کرنا اور توانائی کے استعمال کو بہتر بنانا ہے۔

دستاویز کے مطابق 1.3 ارب ڈالر کے آر ایس ایف پروگرام کے تحت 2027 تک اہم اہداف مقرر کیے گئے ہیں۔ پاکستان قدرتی آفات سے نمٹنے کے لیے ڈیزاسٹر رسک فنانسنگ کو مضبوط کرے گا۔ تمام بڑے ترقیاتی منصوبوں میں موسمیاتی اثرات کا جائزہ لازمی ہوگا، اور ساڑھے 7 ارب روپے سے زائد لاگت کے ہر منصوبے میں کلائمیٹ امپیکٹ اسیسمنٹ کرنا لازم قرار دیا گیا ہے۔

انفرااسٹرکچر منصوبوں میں کم از کم 30 فیصد اخراجات موسمیاتی اقدامات پر خرچ کیے جائیں گے۔ وفاق اور صوبوں میں کلائمیٹ بجٹنگ سسٹم نافذ کیا جائے گا اور ہر سال کلائمیٹ بجٹ رپورٹ جاری کی جائے گی۔ اس کے علاوہ الیکٹرک گاڑیوں کو فروغ دینے کے لیے سبسڈی دی جائے گی اور 2030 تک 30 فیصد نئی گاڑیاں اور 50 فیصد موٹر سائیکلیں الیکٹرک بنانے کا ہدف مقرر کیا گیا ہے۔

توانائی کے استعمال کو بہتر بنانے کے لیے بجلی سبسڈی صرف مستحق صارفین تک محدود ہوگی، جبکہ امیر صارفین کے لیے سبسڈی ختم کر دی گئی ہے۔ لائن لاسز اور بجلی چوری میں کمی لانے کی یقین دہانی بھی آئی ایم ایف کو کرادی گئی ہے۔ ریفریجریٹرز، پنکھے، ایل ای ڈیز، موٹرز اور اے سی کے لیے توانائی لیبل لازمی ہوگا تاکہ توانائی بچانے والے آلات کی فروخت کو فروغ دیا جا سکے۔

پانی کے مؤثر استعمال کے لیے سندھ، خیبر پختونخوا اور بلوچستان میں سروس چارجز وصول کرنے کا پلان بنایا گیا ہے۔ صوبوں میں آبپاشی کے نظام سے آمدن بڑھانے اور سندھ و پنجاب میں پانی کے نرخوں میں ایڈجسٹمنٹ کا نیا نظام بھی لایا جائے گا۔

ماحولیاتی منصوبوں اور مالیاتی حکمت عملی کے تحت ہر سال کلائمیٹ بجٹ رپورٹ جاری کی جائے گی، اور وفاق و صوبوں میں موسمیاتی آفات کے لیے بہتر مالی منصوبہ بندی کی جائے گی۔ بینکوں کے لیے موسمیاتی مالیاتی خطرات کا جائزہ لازمی قرار دیا گیا ہے تاکہ سرمایہ کاری اور مالیاتی فیصلے ماحول دوست ہوں۔