تنخواہ دار طبقے کے لیے بڑی خوشخبری آگئی

وزیر مملکت رانا احسان افضل نے تنخواہ دار طبقے کے لیے آئندہ سال ریلیف دینے کا اعلان کر دیا ہے۔

وزیر مملکت رانا احسان افضل نے کہا کہ حکومت ملازمت پیشہ افراد پر ٹیکس کا بوجھ کم کرنے کی ضرورت کو سمجھتی ہے۔ اسی لیے اگلے بجٹ میں اس طبقے کو سہولت دینے کی کوشش کی جائے گی۔

 انہوں نے کہا کہ کسی بھی ملک میں سرمایہ کاری کے لیے امن و امان سب سے اہم ہوتا ہے۔ جہاں سیکیورٹی کی صورتحال بہتر ہوتی ہے، وہاں سرمایہ کار خود بخود آتے ہیں۔ پاکستان اب مشکل معاشی دور سے نکل چکا ہے۔ ایک وقت تھا جب دیوالیہ ہونے کی باتیں ہو رہی تھیں، مگر اب حالات بہتر سمت میں جا رہے ہیں۔

رانا احسان افضل کا کہنا تھا کہ حکومت نے مختلف شعبوں میں اصلاحات متعارف کروائی ہیں۔ ٹیکس نظام کو بہتر بنایا گیا ہے۔ اس کے نتیجے میں ٹیکس دینے والوں کی تعداد میں تقریباً 30 لاکھ کا اضافہ ہوا ہے۔ ان کا کہنا تھا کہ معیشت کو درست سمت پر ڈال دیا گیا ہے، اگرچہ ابھی بھی کئی چیلنجز موجود ہیں۔

وزیر مملکت نے بجلی کی قیمتوں میں کمی کا بھی ذکر کیا۔ انہوں نے کہا کہ حکومت نے عوام کو ریلیف دینے کے لیے اقدامات کیے ہیں۔ اسی سلسلے میں بجلی کے نرخ کم کیے گئے ہیں تاکہ گھریلو اور صنعتی صارفین کو سہولت ملے۔

رانا احسان افضل نے مزید بتایا کہ بجلی کی تقسیم کار کمپنیوں، یعنی ڈسکوز، کی نجکاری کا عمل جلد شروع کیا جائے گا۔ اس کے لیے باقاعدہ بڈنگ کی جائے گی۔ انہوں نے کہا کہ معیشت کی بہتری کوئی جادو نہیں، اس کے لیے وقت اور مسلسل محنت درکار ہوتی ہے۔

ان کا کہنا تھا کہ پچھلے برسوں کے مقابلے میں اراکین اسمبلی کو ملنے والے فنڈز میں بھی کمی کی گئی ہے۔ حکومت محتاط انداز میں فیصلے کر رہی ہے۔ رانا احسان افضل کے مطابق موجودہ دور میں کی جانے والی اصلاحات کے مثبت نتائج آنے والے وقت میں سامنے آنا شروع ہو جائیں گے۔