کراچی میں بھتہ خوری پر چیئرمین آباد کا شہر میں کاروبار بند کرنے کا اعلان

کراچی میں بھتہ خوری پر چیئرمین آباد نے شہر میں کاروبار بند کرنے کا اعلان کردیا ہے۔

 تفصیلات کے مطابق کراچی میں بھتہ خوری پر چیئرمین آباد حسن بخشی نے شہر میں کاروبار بند کرنے کا اعلان کردیا اور مسائل کے حل کیلئے آئندہ سال 15جنوری کی ڈیڈ لائن دے دی ہے۔

انہوں نے کہا کہ کراچی میں بھتہ خوری عروج پر ہے، مارے 10 ممبرز کو بھتے کی کالز دبئی سے آئی ہیں، 5 کروڑ کا تقاضہ کیا گیا نہ دینے پر فائرنگ کرکے زخمی کردیا گیا۔

حسن بخشی نے انکشاف کیا ہے کہ بھتہ ڈیجیٹل کرنسی میں مانگا جارہا ہے، بھتہ بٹ کوائن کے ذریعے طلب کیا جارہا ہے۔

چیئرمین آباد حسن بخشی نے جی ٹی وی نیوز سے گفتگو کرتے ہوئے کہا کہ بھتہ خوروں کے خلاف کوئی کارروائی نہیں کی جارہی، بھتہ خوری کے واقعات پر قانون حرکت میں نہیں آتا۔

 انہوں نے کہا کہ ہم سے کروڑوں روپے بھتہ مانگا جارہا ہے، بھتہ نہ دینے پر گولی مار دی جاتی ہے، لوگ اپنا کاروبار بیرون ملک منتقل کرنے پر مجبور ہیں۔