وزیرخزانہ نے قوم کو بڑی خوشخبری سنادی

وزارتِ خزانہ نے پاکستان کے لیے بیرونی فنانسنگ کے ایک نئے مرحلے کا اعلان کر دیا ہے۔

وزیر خزانہ محمد اورنگزیب کی زیر صدارت ہونے والے جائزہ اجلاس میں بتایا گیا کہ پاکستان جنوری 2026 میں اپنا پہلا پانڈا بانڈ جاری کرے گا۔ یہ بانڈ ایک طے شدہ پروگرام کا حصہ ہوگا، جس کے تحت مجموعی طور پر تقریباً ایک ارب ڈالر کے مساوی رقم حاصل کی جا سکتی ہے۔

اجلاس میں بتایا گیا کہ اس منصوبے کے لیے کثیر الجہتی شراکت داروں کی منظوری پہلے ہی مل چکی ہے۔ چینی ریگولیٹرز سے حتمی اجازت جنوری کے آغاز میں متوقع ہے۔

وزارتِ خزانہ کے مطابق ابتدائی مرحلے میں پانڈا بانڈ کے ذریعے تقریباً 250 ملین ڈالر کے برابر رقم اکٹھی کی جائے گی۔ اس کے بعد دیگر اقساط بھی جاری کی جائیں گی، جو ریگولیٹری منظوریوں سے مشروط ہوں گی۔

Pakistan Advances Toward USD 1 Billion Panda Bond Program with Inaugural Issuance Targeted for January

Federal Minister for Finance and Revenue, Senator Muhammad Aurangzeb, chaired a meeting at the Finance Division today to review progress on Pakistan’s inaugural Panda Bond… pic.twitter.com/5BtCRTX2R0

— Ministry of Finance, Government of Pakistan (@Financegovpk) December 19, 2025

وزیر خزانہ کا کہنا تھا کہ پانڈا بانڈ چینی کرنسی یوآن میں جاری کیا جائے گا اور اسے چین کی مقامی ڈیٹ مارکیٹ میں فروخت کیا جائے گا۔ اس اقدام کا مقصد پاکستان کے مالی وسائل میں تنوع لانا اور چین کی آن شور مارکیٹ تک براہ راست رسائی حاصل کرنا ہے۔ اس سے قرض کے دباؤ کو بہتر انداز میں منظم کرنے میں مدد ملے گی۔

وزارتِ خزانہ کے مطابق یہ پروگرام پاکستان کی مجموعی قرض مینجمنٹ حکمت عملی کا اہم حصہ ہے۔ حکومت آئی ایم ایف کے 7 ارب ڈالر کے پروگرام کے تحت معیشت کو مستحکم کرنے کے لیے مختلف اصلاحات پر عمل کر رہی ہے۔ انہی اصلاحات کے باعث عالمی سرمایہ کاروں کا اعتماد بحال ہو رہا ہے۔

حکام کا کہنا ہے کہ چینی ادارہ جاتی سرمایہ کاروں کے ساتھ پاکستان کے تعلقات مثبت سمت میں بڑھ رہے ہیں۔ حالیہ معاشی پالیسیوں اور نظم و ضبط نے چین سمیت دیگر ممالک کے سرمایہ کاروں کو پاکستان کی معیشت میں مواقع تلاش کرنے کی ترغیب دی ہے۔