ایران میں اسرائیل کے لیے مبینہ جاسوسی پر ایک شخص کو پھانسی دے دی گئی

ایران کے حکام نے اسرائیل کے لیے جاسوسی کرنے کے الزام میں ایک شخص کو سزائے موت دے دی ہے۔

ایرانی میڈیا کے مطابق 27 سالہ اغیل کشاورز کو اپریل اور مئی کے دوران شمال مغربی شہر ارومیہ میں گرفتار کیا گیا تھا۔

حکام نے الزام عائد کیا کہ اغیل کشاورز اسرائیلی خفیہ ایجنسی موساد کے لیے کام کر رہا تھا اور اس نے فوجی اور سیکیورٹی تنصیبات کی تصاویر لینے سمیت دیگر جاسوسی سرگرمیوں میں حصہ لیا۔

رپورٹس کے مطابق اغیل کشاورز کو اسرائیل کے لیے جاسوسی کرنے اور رابطہ رکھنے کے جرم میں پہلے سزائے موت سنائی گئی تھی، جسے بعد میں سپریم کورٹ نے بھی برقرار رکھا۔ ہفتے کی صبح اسے سرکاری طور پر پھانسی دی گئی۔