پاسپورٹ بنوانے کے خواہشمند شہریوں کیلئے بڑی خوشخبری آگئی

پاسپورٹ بنوانے کے خواہشمند شہریوں کے لیے حکومت کی جانب سے ایک اہم اور خوش آئند قدم اٹھایا گیا ہے۔

محکمہ پاسپورٹس نے درخواستوں کے اندراج، پاسپورٹ پرنٹنگ اور مجموعی کارکردگی کی نگرانی کے لیے نیا اور جدید نظام متعارف کروا دیا ہے۔ اس نظام کا مقصد عوام کو بہتر اور تیز سہولت فراہم کرنا ہے۔

محکمہ پاسپورٹس کے مطابق اب پاکستان سمیت دنیا بھر میں دی جانے والی پاسپورٹ درخواستوں اور ان کی ڈیلیوری کو رئیل ٹائم میں مانیٹر کیا جا سکے گا۔ اس سے نہ صرف تاخیر کے مسائل کم ہوں گے بلکہ درخواست گزاروں کو بروقت معلومات بھی میسر آئیں گی۔

ڈی جی پاسپورٹس کی ہدایت پر ہیڈ کوارٹرز میں ایک خصوصی 24 گھنٹے فعال مانیٹرنگ روم قائم کر دیا گیا ہے۔ اس مانیٹرنگ روم کے ذریعے ڈیجیٹل اور مربوط ڈیش بورڈ پر روزانہ کی بنیاد پر تمام آپریشنز کی نگرانی اور جائزہ لیا جائے گا۔

نئے سسٹم کے تحت پاسپورٹ کے لیے درخواست جمع ہونے سے لے کر پاسپورٹ کی ڈیلیوری تک ہر مرحلے پر کڑی نگرانی کی جائے گی۔ اس کے ساتھ ساتھ پاسپورٹ دفاتر میں رش کی خودکار نشاندہی بھی ممکن ہو سکے گی، جس سے شہریوں کو بہتر سہولت فراہم کی جا سکے گی۔

جدید مانیٹرنگ نظام کے ذریعے پاسپورٹ اسٹاف کی کارکردگی، پرنٹنگ کے عمل اور مشینری کی حالت پر بھی نظر رکھی جائے گی۔ نیٹ ورک مینجمنٹ سسٹم کے تحت بیک لاگ، تکنیکی مسائل اور دیگر امور کی بروقت نشاندہی کی جا سکے گی۔