سجدہ کرنے سے صحت پر کیا اثرات مرتب ہوتے ہیں؟ وجہ جان لیں!

کیا آپ جانتے ہیں کہ سجدہ کرنے سے صحت پر کیا اثرات مرتب ہوتے ہیں؟ اگر نہیں تو جان لیں۔

امریکا میں کی گئی ایک ابتدائی تحقیق سے پتہ چلا ہے کہ صرف چند سیکنڈ کے لیے سجدہ کرنا دماغ کی سرگرمیوں پر نمایاں اثر ڈال سکتا ہے۔

اس تحقیق میں انسانی دماغ کے سگنلز کو مختلف فریکوئنسی بینڈز اور سائنسی پیمانوں کے ذریعے جانچا گیا۔

یہ مطالعہ پی ایم سی (PubMed Central) میں شائع ہوا، جس میں تین خواتین اور دو مرد رضاکار شامل تھے۔ شرکاء کے دماغی سگنلز کو آنکھیں کھلی اور آنکھیں بند دونوں حالتوں میں ریکارڈ کیا گیا۔

مطالعے میں شامل افراد نے ماضی میں کسی نفسیاتی بیماری کا سامنا نہیں کیا تھا، نہ ہی سر یا ریڑھ کی ہڈی کی چوٹ یا آپریشن ہوا تھا، اور وہ نیورو سائیکولوجیکل ادویات استعمال نہیں کر رہے تھے۔ مزید برآں، یہ افراد نماز باقاعدگی سے ادا کرتے تھے۔

نتائج سے ظاہر ہوا کہ خواتین میں سجدے کے دوران دماغی لہروں میں کمی واقع ہوئی، جس سے اندازہ ہوتا ہے کہ دماغ اس وقت نسبتاً سکون یا مختلف طرزِ عمل میں ہوتا ہے۔ مرد شرکاء میں اس کے برعکس کچھ دماغی سرگرمیوں میں اضافہ دیکھا گیا۔

تحقیق کے مصنفین نے واضح کیا کہ یہ ایک ابتدائی پائلٹ اسٹڈی ہے اور سجدے کے دماغی اثرات کو مکمل طور پر سمجھنے کے لیے مزید تفصیلی اور وسیع پیمانے پر تحقیق کی ضرورت ہے۔

سائنسدانوں کے مطابق یہ تحقیق اس بات کی نشاندہی کرتی ہے کہ محض 10 سیکنڈ کا سجدہ بھی دماغ کی سرگرمی پر اثر ڈال سکتا ہے اور یہ اثر مردوں اور خواتین میں مختلف ہو سکتا ہے۔ یہ نتائج نماز کے جسمانی اور ذہنی فوائد کو سمجھنے میں ایک اہم نکتہ پیش کرتے ہیں۔