پاکستان نے صومالیہ کی خودمختاری اور علاقائی سالمیت کو نقصان پہنچانے کی کوشش کو مسترد کردیا

ترجمان دفتر خارجہ نے کہا ہے کہ پاکستان صومالیہ کی خودمختاری، وحدت اور علاقائی سالمیت کو نقصان پہنچانے کی کسی بھی کوشش کو مکمل طور پر مسترد کرتا ہے۔

ترجمان کے مطابق پاکستان اسرائیل کی جانب سے نام نہاد صومالی لینڈ کو تسلیم کرنے کے اعلان کی سخت الفاظ میں مذمت کرتا ہے۔

دفتر خارجہ نے اپنے بیان میں کہا کہ ایسے غیر قانونی اور اشتعال انگیز اقدامات بین الاقوامی قانون کی کھلی خلاف ورزی ہیں، جو نہ صرف صومالیہ بلکہ پورے خطے کے امن و استحکام کے لیے سنگین خطرہ بن سکتے ہیں، اس نوعیت کے اقدامات علاقائی کشیدگی کو بڑھا سکتے ہیں اور تنازعات کو ہوا دینے کا سبب بن سکتے ہیں۔

ترجمان نے کہا کہ پاکستان عالمی برادری سے مطالبہ کرتا ہے کہ وہ صومالیہ کی وحدت کے خلاف کسی بھی اقدام کو مسترد کرے اور بین الاقوامی قوانین و اقوام متحدہ کے چارٹر کے مطابق صومالیہ کی خودمختاری اور علاقائی سالمیت کا احترام یقینی بنائے۔

دفتر خارجہ نے واضح کیا کہ پاکستان صومالیہ کی خودمختاری، وحدت اور علاقائی سالمیت کی مکمل اور غیر متزلزل حمایت جاری رکھے گا اور صومالی عوام کے ساتھ یکجہتی کا اعادہ کرتا ہے۔