جدہ ایئرپورٹ پر پی آئی اے کی دو ایئر ہوسٹس کے درمیان ہاتھا پائی ہوگئی

قومی ائیر لائن کی جدہ سے ملتان آنے والی پرواز میں تعینات دو فضائی میزبانوں کے درمیان جھگڑے کا واقعہ پیش آیا ہے۔

ذرائع کے مطابق دونوں خواتین کے درمیان تلخ کلامی بڑھتے ہوئے ہاتھا پائی میں تبدیل ہوگئی، جو جدہ ایئرپورٹ کے ڈیپارچر لاؤنج میں ہوئی۔

واقعے کے دوران ائیر لائن کے ایک افسر نے مداخلت کرتے ہوئے صورتحال کو قابو میں کیا اور دونوں فضائی میزبانوں کو الگ کیا۔ اس دوران پیش آنے والے واقعے کی ویڈیو بھی سوشل میڈیا پر گردش کر رہی ہے۔

ترجمان پی آئی اے نے واقعے کی تصدیق کرتے ہوئے بتایا کہ یہ واقعہ 23 دسمبر کو پیش آیا تھا، انتظامیہ نے معاملے کا فوری نوٹس لیتے ہوئے ضابطے کے تحت دونوں فضائی میزبانوں کو معطل کردیا ہے اور واقعے کی مزید تحقیقات جاری ہیں۔