حماس نے اپنے ترجمان القسام ابو عبیدہ کی شہادت کی تصدیق کردی

غزہ: فلسطین کی مزاحمتی تنظیم حماس نے اپنے عسکری ونگ، القسام بریگیڈز کے ترجمان ابو عبیدہ اور دیگر اہم کمانڈروں کی شہادت کی تصدیق کردی ہے۔

عالمی خبر رساں اداروں کے مطابق حماس نے اعلان کیا کہ القسام کے معروف ترجمان ابو عبیدہ، حماس کے سربراہ محمد سنوار، رفح بریگیڈ کے کمانڈر محمد شعبانہ اور اعلیٰ کمانڈرز حکم العیسیٰ اور رائد سعد بھی اسرائیلی فوج کی کارروائیوں میں شہید ہو چکے ہیں۔

بیان میں کہا گیا ہے کہ یہ تمام رہنما مختلف اوقات اور مختلف مقامات پر اسرائیلی بمباری اور چھاپوں کے دوران شہید ہوئے۔

حماس نے واضح کیا کہ ان کا اصل نام حذیفہ الکحلوت تھا اور وہ کئی برسوں تک القسام بریگیڈز کے ترجمان کے طور پر فعال رہے، جبکہ فلسطینی عوام اور عالمی میڈیا میں ان کی آواز نمایاں اور بااثر رہی۔

ابو عبیدہ ہمیشہ نقاب کے ساتھ نظر آتے تھے اور ان کی شناخت طویل عرصے تک خفیہ رکھی گئی۔ وہ جنگ بندی کی خلاف ورزیوں، قیدیوں کے تبادلے اور میدانِ جنگ کی پیش رفت کے حوالے سے بیانات دیتے تھے، جنہیں نہ صرف فلسطینی عوام بلکہ عالمی میڈیا نے بھی بڑی توجہ سے کوریج دی۔

واضح رہے کہ اس سے قبل حماس کے سابق سیاسی سربراہ اسماعیل ہنیہ، حماس کے دیگر رہنما یحییٰ سنوار اور القسام کے بانیوں میں شامل محمد ضیف بھی اسرائیلی حملوں میں شہید ہو چکے ہیں۔