پیٹرولیم مصنوعات کی نئی قیمتوں کا اعلان

بحرین حکومت نے کمپنیوں، فیکٹریوں اور گاڑیوں کے لیے پیٹرولیم مصنوعات کی قیمتوں میں آئندہ تبدیلیوں کا اعلان کر دیا ہے۔

بحرین حکومت نے یہ فیصلہ مقامی اور عالمی منڈی کی صورتحال کے تجزیے اور 2015 میں کیے گئے سابقہ اقدامات کے ازسرنو جائزے کے بعد کیا گیا ہے۔ حکومت کا مقصد توانائی کی اصل لاگت کے قریب قیمتیں لانا اور توانائی کے مؤثر استعمال کو فروغ دینا ہے۔

اعلامیے کے مطابق کمپنیوں اور فیکٹریوں کے لیے قدرتی گیس کی قیمت میں مرحلہ وار اضافہ کیا جائے گا۔ اس پالیسی کے تحت جنوری 2026 سے ہر سال 50 سینٹ اضافہ ہوگا، اور یہ اضافہ آئندہ چار سال تک جاری رہے گا۔ اس اقدام سے صنعتی ادارے قابلِ تجدید توانائی میں سرمایہ کاری کی طرف راغب ہوں گے۔

گاڑیوں کے ایندھن کی قیمتوں کے تعین کے لیے حکومت نے ایک نئی کمیٹی بھی قائم کی ہے۔ اس کمیٹی میں سرکاری ادارے اور کمپنیوں کے نمائندے شامل ہوں گے۔ یہ کمیٹی ہر ماہ ایندھن کی قیمتوں کا جائزہ لے گی اور نئی قیمتوں کا اعلان کرے گی۔

نئے نظام کے تحت سپر (98 آکٹین)، پریمیئم (95 آکٹین)، ریگولر (91 آکٹین) اور ڈیزل کی قیمتیں مقرر کی جائیں گی۔ تاہم، ماہی گیروں کے لیے ڈیزل پر سبسڈی برقرار رہے گی۔ حکومت نے کہا ہے کہ ایندھن کی نئی قیمتوں کا باضابطہ اعلان کمیٹی کے اجلاس کے بعد جلد کیا جائے گا۔