کسی بھی حملے کا بھرپور جواب دیا جائے گا، ایرانی سپریم لیڈر کا امریکا اور اسرائیل کو دو ٹوک پیغام

ایران کے سپریم لیڈر آیت اللہ علی خامنہ ای کے مشیر علی شمخانی نے امریکا اور اسرائیل کو خبردار کیا ہے کہ ایران کے خلاف کسی بھی قسم کی جارحیت کا سخت اور فیصلہ کن جواب دیا جائے گا۔

ان کا یہ بیان ایسے وقت میں سامنے آیا ہے جب امریکی صدر ڈونلڈ ٹرمپ کی جانب سے ایران کو نئے ہتھیار حاصل کرنے سے روکنے کی بات کی گئی تھی۔

بین الاقوامی رپورٹس کے مطابق علی شمخانی نے سماجی رابطے کی ویب سائٹ ایکس پر اپنے بیان میں کہا کہ ایران کی میزائل اور دفاعی صلاحیتیں کسی دباؤ یا بیرونی حکم کے تحت محدود نہیں کی جا سکتیں۔ انہوں نے واضح کیا کہ ایران اپنی سلامتی کے تحفظ کے لیے ہر ضروری اقدام کرے گا اور اس حوالے سے کسی اجازت کا محتاج نہیں۔

یہ بیان ٹرمپ اور اسرائیلی وزیر اعظم بنیامین نیتن یاہو کی مشترکہ نیوز کانفرنس کے بعد سامنے آیا، جس میں امریکی صدر نے کہا تھا کہ اگرچہ امریکا مذاکرات کے لیے تیار ہے، لیکن ایران کی جانب سے دوبارہ جوہری صلاحیتیں حاصل کرنے کی کسی بھی کوشش کو فوری طور پر ناکام بنا دیا جائے گا۔

دوسری جانب ایرانی وزارت خارجہ کے ترجمان اسماعیل بقائی نے بھی کہا ہے کہ ایران اسرائیل کی سرگرمیوں پر کڑی نظر رکھے ہوئے ہے اور اپنی دفاعی تیاریوں میں مزید اضافہ کر رہا ہے۔ ان کا کہنا تھا کہ کسی بھی نئی مہم جوئی کا جواب ماضی کی بارہ روزہ جنگ سے کہیں زیادہ سخت ہوگا۔

ایران کے یہ سخت مؤقف ایسے وقت میں سامنے آئے ہیں جب اطلاعات ہیں کہ اسرائیل، ایران کے بیلسٹک میزائل پروگرام کو محدود کرنے کے لیے امریکا کے ساتھ مشترکہ کارروائی پر زور دے رہا ہے۔

ادھر ایران نے عالمی جوہری توانائی ایجنسی کے معائنہ کاروں کے ساتھ تعاون معطل کر دیا ہے اور ایک نیا قانون منظور کیا ہے جس کے تحت آئندہ کسی بھی جوہری معائنے کے لیے اعلیٰ قومی سلامتی کونسل کی منظوری لازمی قرار دی گئی ہے۔