سونے کے خریدار ہوجائیں ہوشیار!!! قیمتوں میں کمی اور اضافے سے متعلق بڑی خبر آگئی

ملک بھر میں سونے کی قیمتوں میں مسلسل اضافہ عام آدمی کے لیے بڑا مسئلہ بن چکا ہے۔ متوسط طبقے کی قوت خرید تقریباً ختم ہو چکی ہے اور لوگ مہنگے زیورات خریدنے سے گریز کر رہے ہیں۔

اس حوالے سے نجی ٹی وی چینل کے شو میں چئیرمین جیولرز مینو فیکچررز ایسوسی ایشن محمد ارشد نے سونے کی قیمت میں اضافے کی وجوہات سے آگاہ کیا۔ ان کے مطابق رواں مالی سال کے دوران عالمی مارکیٹ میں سونے کی فی اونس قیمت میں تقریباً 2 ہزار ڈالر کا اضافہ ہوا، جس کے اثرات پاکستان میں بھی دیکھے گئے۔

محمد ارشد نے بتایا کہ عالمی مارکیٹ میں چین اور دیگر ممالک کی تیز رفتار خریداری بھی قیمت بڑھنے کی ایک بڑی وجہ ہے۔ انہوں نے کہا کہ اگر عالمی معیشت مستحکم رہتی ہے، سود کی شرحیں بلند رہتی ہیں اور ڈالر کی قدر مضبوط ہوتی ہے تو سونے کی قیمتوں میں استحکام آسکتا ہے۔

ایک سوال کے جواب میں محمد ارشد نے بتایا کہ قیام پاکستان سے آج تک سونے کی قیمت میں کمی کبھی نہیں آئی اور سال 2026 میں بھی مزید اضافہ متوقع ہے۔ انہوں نے یہ بھی بتایا کہ ملک میں چاندی کا مستقبل بھی روشن ہے اور سرمایہ کار اس میں دلچسپی بڑھا سکتے ہیں۔