بجلی مزید مہنگی ہونے کا امکان

ملک بھر کے بجلی صارفین کو ایک بار پھر اضافی بوجھ اٹھانا پڑ سکتا ہے، کیونکہ ماہانہ فیول پرائس ایڈجسٹمنٹ کی بنیاد پر بجلی کے نرخوں میں اضافے کا امکان ظاہر کیا جا رہا ہے۔

سینٹرل پاور پرچیزنگ ایجنسی (سی پی پی اے) نے دسمبر کے مہینے کی فیول پرائس ایڈجسٹمنٹ سے متعلق درخواست نیشنل الیکٹرک پاور ریگولیٹری اتھارٹی (نیپرا) میں جمع کرا دی ہے۔

درخواست کے مطابق دسمبر میں مجموعی طور پر 8 ارب 48 کروڑ 70 لاکھ یونٹس بجلی پیدا کی گئی، جبکہ تقسیم کار کمپنیوں (ڈسکوز) کو 8 ارب 20 کروڑ 80 لاکھ یونٹس فراہم کی گئیں۔

سی پی پی اے کی جانب سے جمع کرائے گئے اعداد و شمار کے مطابق اس دوران بجلی کی اوسط فی یونٹ لاگت 9 روپے 62 پیسے رہی۔ نیپرا اس درخواست پر 29 جنوری کو سماعت کرے گی، جس کے بعد بجلی کی قیمتوں میں ردوبدل سے متعلق حتمی فیصلہ کیا جائے گا۔